Asociacioni i Gazetarëve të Kosovës (AGK) ka prezantuar raportin dhe indeksin vjetor për lirinë e medias dhe sigurinë e gazetarëve në Kosovë për vitin 2024, në kuadër të platformës rajonale SafeJournalists Network, shkruan Katror.info
Raporti u prezantua nga autorja dhe hulumtuesja, njëkohësisht Drejtorja Ekzekutive e AGK-së, Getoarbë Mulliqi. Pjesë e panelit ishin edhe Kryetari i Bordit të AGK-së, Xhemajl Rexha, dhe Zyrtari Ligjor i AGK-së, Yll Zekaj, i cili ka shërbyer si ekspert ligjor në përgatitjen e raportit.
Sipas gjetjeve të raportit, gjatë vitit 2024 janë regjistruar 53 raste të kërcënimeve dhe sulmeve ndaj gazetarëve. Prej tyre, nëntë janë cilësuar si kërcënime serioze për jetë, shtatë kanë qenë sulme fizike, ndërsa 18 raste kanë përfshirë forma të ndryshme të presionit jofizik.
Mundesh me e lexu edhe...
Një tjetër zhvillim alarmues ka qenë rritja e ndjeshme e sulmeve dhe fyerjeve në hapësirën online, ku në mënyrë të veçantë në shënjestër kanë qenë gazetaret gra, të cilat janë përballur me gjuhë të urrejtjes dhe kërcënime të vazhdueshme.
Raporti evidenton gjithashtu 13 raste të sulmeve, ndërhyrjeve apo presioneve të drejtpërdrejta ndaj mediave dhe organizatave mediale.
Në mesin e shqetësimeve më të mëdha, sipas AGK-së, qëndron presioni politik i ushtruar mbi mediat, ku rasti i dorëheqjes së Drejtorit të Përgjithshëm të RTK-së, Shkumbin Ahmetxhekaj, theksohet si pasojë e ndërhyrjeve të hapura institucionale. Po ashtu, raporti përfshin raste të sulmeve verbale dhe ligjore ndaj mediave nga zyrtarë të lartë shtetërorë.
Një tjetër prirje e rrezikshme që del nga raporti është rritja e rasteve të padive SLAPP (Strategic Lawsuits Against Public Participation) të ngritura kundër gazetarëve dhe aktivistëve. Rastet e Robert Bojaj, Ardiana Thaçi Mehmeti, Betim Musliu, Ehat Miftarit dhe Leonida Molliqajt konsiderohen si përpjekje të drejtpërdrejta për të heshtur raportimin kritik dhe për të frikësuar zërat që angazhohen për çështje me interes publik.
Në anën tjetër, një zhvillim pozitiv i theksuar në raport është themelimi i Rrjetit të Grave Gazetare të Kosovës. Kjo nismë synon të fuqizojë gazetaret në një mjedis të brishtë profesional, duke ofruar mbështetje konkrete dhe strukturore në mungesë të një sindikate funksionale për gazetaret në vend.
AGK bëri të ditur se raporti i plotë do të jetë i qasshëm për publikun në fund të këtij muaji në faqen zyrtare të organizatës, ndërsa ritheksoi përkushtimin e saj për të mbrojtur të drejtat e gazetarëve dhe për të avancuar standardet e gazetarisë së lirë dhe të sigurt në Kosovë. /Katror.info
Përgatiti:
