Një grup prej 30 anëtarësh të Shoqatës Bjeshkatare “Prenj” nga Mostari i Bosnjë e Hercegovinës, zhvilloi një vizitë dyditore në Kosovë, gjatë së cilës realizuan dy ngjitje në majat më të larta të vendit dhe u pritën ngrohtësisht nga homologët e tyre kosovarë.
Vizita nisi me një takim miqësor në zyrat e Shoqatës Bjeshkatare “Haxhi Beda” në Prizren, ku përfaqësuesit e të dy shoqatave ndanë përvojat e tyre shumëvjeçare në lëvizjen bjeshkatare dhe ranë dakord për të forcuar bashkëpunimin e ndërsjellë përmes organizimit të aktiviteteve të përbashkëta në të ardhmen.
Takimi, që u zhvillua në një atmosferë vëllazërore, shërbeu si urë lidhëse ndërmjet dy komuniteteve me pasion të përbashkët për natyrën dhe ecjet malore.
Mundesh me e lexu edhe…
Pas takimit, në ditën e parë të qëndrimit, bjeshkatarët nga Mostari, të shoqëruar nga anëtarët e “Haxhi Beda”-s, ndërmorën ngjitjen drejt majes së Gjeravicës (2,656 m), pika më e lartë në territorin e Republikës së Kosovës.
Ngjitja u përshkua me mot të favorshëm dhe përjetime të jashtëzakonshme në një natyrë të paprekur dhe panoramë mahnitëse.
Dita e dytë e vizitës ishte po aq sfiduese dhe mbresëlënëse. Grupi realizoi një tjetër ecje alpine, këtë herë drejt majes së Rudokës, një ndër majat më të larta të vargmalit të Sharrit që shtrihet në kufirin ndërmjet Kosovës dhe Maqedonisë së Veriut, shkruan RTK.
Kjo zonë njihet për biodiversitetin e saj të pasur dhe është një destinacion i çmuar për adhuruesit e natyrës. Kjo vizitë dyditore u shndërrua në një përvojë të pasur shpirtërore dhe kulturore, ndërmjet njerëzve të viseve të ndryshme.
Shoqatat shprehën gatishmërinë për të intensifikuar kontaktet, me qëllim zhvillimin e aktiviteteve të përbashkëta në rajon, promovimin e turizmit malor dhe mbrojtjen e mjedisit./Katror.info
