Në një ceremoni të nivelit të lartë të organizuar nga Parlamenti Ndërkombëtar i Grave në Dubai, Ambasadorja e Vullnetit të Mirë për Kosovën në Komisionin Ndërkombëtar për të Drejtat e Njeriut (IHRC), Elvana Shala, u nderua me çmimin prestigjioz “Iconic Women Award”.
Ky çmim i rëndësishëm iu dorëzua nga Seyed Mohammed Siam Hosseini, Shef i Zyrës së Grupit të Kompanive të Lartmadhërisë së Tij, Sheik Zayed Bin Maktoum Bin Rashed Al Maktoum, në shenjë vlerësimi për dy dekada përkushtimi të Shalës në avokimin për të drejtat e njeriut dhe zhvillimin gjithëpërfshirës në Kosovë.
Në fokus të kontributit të saj është ngritja e zërit për kategoritë e margjinalizuara – përfshirë personat me nevoja të veçanta, të mbijetuarat e dhunës seksuale gjatë luftës, si dhe promovimi i diplomacisë publike të Kosovës në arenën ndërkombëtare, shkruan Telegrafi.
Mundesh me e lexu edhe…
“Vij nga Kosova, një vend që doli nga hiri i luftës pak më shumë se dy dekada më parë, dhe kam qenë dëshmitare e drejtpërdrejtë se si gratë i mbajnë kombet mbi supe si në kohë lufte, ashtu edhe në paqe. Kur institucionet u shembën, gratë i mbajtën komunitetet të bashkuara. Kur heshtja rrezikonte drejtësinë, gratë folën. Dhe kur të tjerët hoqën dorë, gratë dolën përpara”, deklaroi Elvana Shala.
Ajo përkujtoi rolin kyç të grave kosovare në periudhën e pasluftës, duke përmendur emra të njohur si ish-presidentja Atifete Jahjaga, Igo Rugova, Feride Rushiti, Edita Tahiri e shumë të tjera, të cilat dhanë kontribute historike në forcimin e të drejtave të njeriut dhe në ndërtimin e paqes.
“Fuqizimi fillon në shtëpi, forcohet përmes arsimit dhe kulmon me përfaqësim të barabartë në vendimmarrje. Nuk mjafton t’i japim grave një vend në tavolinë – duhet të sigurohemi që të kenë zë, ndikim dhe respekt,” theksoi Shala.
Në fund të fjalës së saj, ajo dha një mesazh të fuqishëm për vajzat dhe gratë në mbarë botën.
“Për vajzën që po pyet veten nëse është e mjaftueshme – ti jo vetëm që je e mjaftueshme. Ti je e domosdoshme.”
Çmimi “Iconic Women Award” ndahet çdo vit për gratë që kanë ndikuar në mënyrë të qëndrueshme në transformimin e shoqërisë përmes lidershipit, angazhimit qytetar dhe fuqizimit të komuniteteve. /Katror.info
Përgatiti:
