Institucioni i Avokatit të Popullit organizoi një tryezë të rrumbullakët me temën “Liria e mediave dhe siguria e gazetarëve”, ku u diskutua gjendja aktuale e mediave në Kosovë dhe sfidat me të cilat përballen gazetarët.
Avokati i Popullit, Naim Qelaj, theksoi se liria e mediave bën pjesë në katalogun e të drejtave të njeriut dhe është e lidhur ngushtë me lirinë e shprehjes – dy shtylla themelore të demokracisë dhe respektimit të të drejtave të njeriut.
“Reporterët pa Kufij e kanë renditur më poshtë Kosovën në raportin e fundit, dhe problematikat që kanë ndikuar në këtë vlerësim lidhen edhe me indikatorët matës. Nëse analizojmë më thellë, ndërhyrjet politike në media dhe siguria e gazetarëve janë ndër çështjet më kritike. Kjo rënie në indeks tregon presionin dhe ndikimin politik ndaj gazetarëve – gjë që duhet të ndryshojë. Duhet të adresohen të gjitha gjetjet dhe të merren masa konkrete që Kosova të renditet më lart në respektimin e lirisë së mediave”, tha Qelaj.
Mundesh me e lexu edhe…
Kryetari i Asociacionit të Gazetarëve të Kosovës (AGK), Xhemajl Rexha, tha se liria e mediave në Kosovë vazhdon të jetë e sulmuar.
“Tre arsyet kryesore që, sipas nesh, kanë ndikuar në përkeqësimin e situatës janë: ligji për KPM-në, ndërhyrjet në RTK dhe fushatat denigruese ndaj gazetarëve. Ne kemi 46 sulme të ndryshme ndaj gazetarëve, shumë prej të cilëve kanë qenë të rrezikuar, sidomos gjatë fushatës zgjedhore të Lëvizjes Vetëvendosje”, deklaroi Rexha.
Edhe juristja për lirinë e mediave, Flutura Kusari, tha se liria e mediave në Kosovë është e cenueshme.
“Raporti i fundit është i saktë dhe asnjë nga institucionet nuk e ka demantuar atë. Sistemi gjyqësor është mbrojtësi më i madh i të drejtave të gazetarëve, por fatkeqësisht, pushteti vazhdimisht ka bërë fushata denigruese kundër komunitetit të gazetarëve në Kosovë”, tha Kusari./RTK/Katror.info
