Për lojtarët e skuadrës suedeze Hacken e rëndësishme ishte të siguronin penalltitë. Më pas situatën në dorë do ta merrte portieri Etrit Berisha.
Kështu edhe ndodhi.
Më 24 korrik BK Hacken e humbi 1:0 nga Anderlechti ndeshjen e parë të raundit të dytë kualifikues të Ligës së Konferencës.
Mundesh me e lexu edhe...
Në ndeshjen e kthimit, të enjten mbrëma në Goteborg, Hackeni kaloi në epërsi 1:0 në minutën e 33-të. Anderlechti, që për trajner e ka Besnik Hasin, barazoi në 1:1 në minutën e 54-t. Ky rezultat e kualifikonte Anderlechtin, por Hackeni fitoi penallti në minutat shtesë dhe e realizoi atë. Në vazhdime nuk u shënuan gola dhe sfida vendosej me penallti.
Në serinë e dytë Ludwig Augustinsson i Anderlechtit e gjuajti topin jashtë. Në serinë e katërt, Etrit Berisha fillimisht ndali gjuajtjen e Luis Vazquezit e më pas e dërgoi vetë topin në rrjetë për festën e madhe të lojtarëve të Hackenit dhe 4.000 shikuesve në tribuna.
“Specialist i penalltive” është quajtur Berisha nga mediumi i madh suedez, “Aftonbladet”.
“Jam ndier mirë pasi ndala një penallti më parë. Jam ndier i sigurt dhe unë jetoj për ndeshje si kjo”, ka thënë portieri 36-vjeçar.
Ai iu bashkua Hackenit në prill, ndonëse nuk kishte luajtur për gati një vit. Karrierë ka bërë kryesisht në Itali. Ishte te skuadra si Empoli, Torino, Spal, Atalanta e Lazio. Berisha është zhvilluar fillimisht te 2 Korriku në Prishtinë e më pas te Kalmari në Suedi. Për Shqipërinë i ka 81 ndeshje.
“Ne vërtetë kemi pasur një pjesë të parë shumë të mirë dhe është dashur të shënojmë më shumë gola. Kemi fituar një ndeshje të rëndësishme ndaj një ekipi të madh, pas një paraqitjeje të tmerrshme ndaj Djurgardenit. Ishte vërtet një hakmarrje e bukur”, ka theksuar Berisha.
Hakceni kishte pësuar 6:1 nga Djurgardeni në fundjavë, në kampionatin suedez.
Berisha edhe në maj ishte vendimtar në triumfin e Hackenit në Kupën e Suedisë. Ndali penallti dhe realizoi nga pika e bardhë.
“Ai është i shkëlqyer në penallti. Nuk e di çka të them tjetër. Është absolutisht i shkëlqyer”, ka thënë kapiteni i ekipit suedez, Simon Gustafson.
Portieri kosovar është lavdëruar edhe nga trajneri Jens Gustaffson.
“Është shumë mirë që e kemi me ne. Ai jo vetëm që bën pritje vendimtare, por po ashtu ofron qetësi për skuadrën. Na duhet përvoja e tij”, ka theksuar Gustaffson.
Skuadra e Berishës në raundin e tretë takohet me Brannin e Norvegjisë. Me shtatlartin në formë, edhe ky raund vlerësohet i kalueshëm.
Për dallim nga Berisha, Besnik Hasi kishte mbrëmje të vështirë në Suedi.
“Ishim të tmerrshëm. Nuk kishim intensitet. Ishim të ngadalshëm. Nuk kemi hyrë asnjëherë në lojë, sidomos në pjesën e parë. Mund të ishte 3:0 që në pjesën e parë. Nuk kishim lojë defenzive. Duhet t’i përmirësojmë shumë gjëra. Kemi bërë punë të keqe. Të gjithë ne. Tani duhet të vazhdojmë të punojmë dhe të mësojmë nga gabimet tona. Nuk mund të bazohemi vetëm në talent”, ka thënë trajneri i Anderlechtit, Hasi./KOHA/Katror.info.
