Oda Ekonomike e Kosovës (OEK), së bashku me përfaqësues të bizneseve nga e gjithë Kosova, sërish do të mbajnë një protestë të mërkurën, nga ora 11:00 deri në 12:00, në sheshin e Prishtinës.
Kjo protestë synon të kundërshtojë mënyrën se si bizneset janë detyruar të hyjnë në tregun e lirë të energjisë elektrike, pa pasur përgatitje të mjaftueshme.
Kryetari i OEK-së, Lulzim Rafuna, në një konferencë për media, theksoi se protesta do të jetë paqësore dhe bëri thirrje që Qeveria të rishikojë vendimin e marrë.
Mundesh me e lexu edhe…
Ai tha se kërkojnë një afat njëvjeçar dhe një paketë ligjore për të lehtësuar tranzicionin për bizneset dhe për të mbrojtur qytetarët.
“Protesta do të mbahet nesër nga ora 11:00 deri në 12:00. I ftojmë të gjithë ata që preken nga ky vendim të na bashkohen për të mirën e vendit. Kërkojmë që Qeveria të reflektojë dhe të mbështesë biznesin dhe ekonominë, duke dhënë një afat të përshtatshëm për kalimin në tregun e lirë dhe duke përgatitur masa ligjore për këtë tranzicion”, tha Rafuna.
Ai shtoi se, nëse Qeveria nuk ndryshon qëndrim, bizneset do të detyrohen të vazhdojnë protestat.
Rafuna kritikoi gjithashtu ZRRE-në për mungesën e përgatitjes dhe ofertave të mjaftueshme për konsumatorët në tregun e lirë të energjisë.
Kryetari i Aleancës Kosovare të Biznesit (AKB), Agim Shahini, deklaroi se takimi me përfaqësuesit e KEK-ut nuk solli përgjigje të kënaqshme dhe shprehu se pakënaqësitë e bizneseve do të shprehen në protestë.
“1300 biznese dhe familjet e punëtorëve të tyre janë në një situatë të vështirë. Ndërsa bizneset vazhdojnë të ofrojnë shërbimet e tyre, njëkohësisht po përgatiten për protestën e nesërme, e cila pritet të jetë shumë e madhe”, tha Shahini, duke kërkuar që Qeveria të shtyjë zbatimin e vendimit për një vit.
Skender Krasniqi, kryetar i Dhomës së Tregtisë në Kosovë, deklaroi se nga 1300 biznese që janë përfshirë në procesin e liberalizimit, vetëm tri kanë arritur marrëveshje me KEK-un.
Ai ftoi qytetarët që të dalin dhe të mbështesin protestën kundër këtij vendimi.
Ndryshe, ditë më parë u mbajt një protestë e organizuar nga Oda Ekonomike e Kosovës (OEK), me pjesëmarrjen e bizneseve nga e gjithë Kosova duke bllokuar një pjesë të hyrje – daljeve të Prishtinës, e cila zgjati për dy orë./Katror.info
