Teatri i Gjilanit do të mirëpresë premierën e shfaqjes “Chatroom”, me autorin irlandez Enda Walsh dhe regjinë e Erson Zymberit, më 21 dhe 22 qershor, duke filluar nga ora 20:00.
Në njoftimin zyrtar të teatrit, shfaqja përshkruhet si një dramë therëse dhe urgjente, e cila eksploron errësirën psikologjike të adoleshencës moderne në epokën digjitale. “Chatroom” sjell rrëfimin e gjashtë adoleshentëve që takohen në një hapësirë virtuale, ku një bisedë e zakonshme shndërrohet në një lojë të rrezikshme mendore.
Regjisori Erson Zymberi sjell në skenë tensionin emocional dhe realitetin e fshehur pas ekraneve të ndritshëm, duke u fokusuar në ndikimin që fjalët – të shkruara e të papërballuara në kohë reale – mund të kenë në jetën e të rinjve. Në thelb, shfaqja është një pasqyrë e gjeneratës që rritet në izolim virtual dhe kërkon ndjeshmëri në një botë të ftohtë komunikimi.
Mundesh me e lexu edhe…
“Chatroom” përbën një thirrje të qartë për ndërgjegjësim rreth fuqisë së komunikimit digjital dhe pasojave që mund të sjellë mungesa e kontaktit të vërtetë njerëzor.
Në këtë produksion interpretojnë aktorët: Elton Tahiri, Andi Bajgora, Fiona Abdullahu, Rinesa Behluli dhe Drin Berisha.
Shfaqja pritet të zgjojë debat e reflektim, veçanërisht mes të rinjve dhe prindërve, për sfidat që sjell jeta në epokën e internetit dhe rrjeteve sociale./Katror.info
