Zbulim i rëndësishëm në astronomi – Falë shpërthimeve të shpejta radio (FRB), astronomët kanë arritur të lokalizojnë një pjesë të madhe të materies së zakonshme që mungonte në univers.
Kjo materie – që përfshin protonet dhe neutronet – ishte e padukshme për teleskopët për dekada. Edhe pse dihej që ekzistonte, nuk dihej saktësisht ku ndodhej, shkruan CNN, përcjell Katror.info.
Studiuesit përdorën 69 shpërthime radio që udhëtojnë nëpër hapësirë si impulse të shkurtra dhe ndriçojnë mjegullën ndërgalaktike. Duke matur sa ngadalësohet drita, ata arritën të “peshojnë” materien e shpërndarë në hapësirat mes galaktikave.
Mundesh me e lexu edhe…
Rezultatet tregojnë se:
- 76% e materies së zakonshme ndodhet në hapësirën ndërmjet galaktikave si gaz i nxehtë me dendësi të ulët
- 15% në halo galaktike
- 9% brenda galaktikave, si yje, planete ose gaz i ftohtë
Ky zbulim u realizua përmes një rrjeti të gjerë teleskopësh në Kaliforni, Hawaii, Australi dhe vende të tjera.
“Ky ishte problemi i famshëm i materies së humbur – ne e dinim që ekzistonte, por nuk mund ta shihnim. Tani, falë FRB-ve, e dimë: tri të katërtat e saj ndodhen mes galaktikave,” tha Liam Connor, autor kryesor i studimit.
Ky zbulim pritet të ndihmojë në hartimin më të detajuar të rrjetit kozmik dhe në kuptimin më të thellë të mënyrës se si formohen dhe zhvillohen galaktikat./Katror.info
