Në ambientet e Komitetit Olimpik të Kosovës, u nënshkrua marrëveshja e bashkëpunimit mes Federatës së Pingpongut të Kosovës (FPPK), e përfaqësuar nga Sekretari i Përgjithshëm Fadil Luta, dhe Klubit të Pingpongut Priping, i përfaqësuar nga kryetari Kastriot Orana, njofton Klubi Priping.
Qëllimi i kësaj marrëveshjeje është avancimi i organizimit të edicionit të tretë të turneut ndërkombëtar të pingpongut Prishtina Open 2025, i cili do të mbahet nga data 20 deri më 22 qershor 2025, në kryeqytetin e Kosovës. Kjo ngjarje pritet të sjellë përballje spektakulare dhe pjesëmarrje ndërkombëtare edhe më të gjerë, duke e shndërruar në një prej turneve më atraktiv të pingpongut në rajon.
Marrëveshja parasheh bashkëorganizimin e turneut, ku FPPK do të mbështesë me paisje profesionale, gjyqtarë, perkrahje teknike dhe promovuese, ndërsa KPP Priping do të sigurojë menaxhimin operativ dhe promovimin e ngjarjes.
Mundesh me e lexu edhe…
Ndër pikat kryesore të bashkëpunimit janë:
- 4 lojtarët më të mirë të Kosovës nga kategoritë U11, U13, U19 dhe Senior/Seniore do të përfitojnë pjesëmarrje falas në turne, sipas renditjes së datës 1 qershor 2025.
- Zbritje për të gjithë lojtarët e regjistruar në FPPK, si stimulim për përfshirje më të gjerë në garë.
- Përkrahje me pajisje nga FPPK, përfshirë tavolina, taraflex dhe gjyqtarë për kategoritë kryesore.
- Promovim i përbashkët në rrjetet sociale dhe materialet zyrtare të turneut.
Përmes kësaj marrëveshjeje, të dyja palët riafirmojnë përkushtimin për zhvillimin e pingpongut në Kosovë, duke e ngritur standardin organizativ të turneve ndërkombëtare dhe duke ofruar më shumë mundësi për sportistët vendorë.
Turneu Prishtina Open 2025 organizohet nga Klubi i Pingpongut Priping dhe është pjesë e kalendarit të ETTU-së të aktiviteteve në sportin e pingpongut, duke tërhequr vëmendjen e klubeve dhe lojtarëve nga e gjithë Evropa./Katror.info
Përgatiti:
