Guvernatori i Bankës Qendrore të Republikës së Kosovës (BQK), Ahmet Ismaili, mori pjesë në ceremoninë e 100-vjetorit të Bankës së Shqipërisë dhe në konferencën ndërkombëtare me temë “Një shekull banking qendror: Nga themelimi institucional te roli si ankorë rajonale”, organizuar në Tiranë.
Në këtë ngjarje të rëndësishme, që trajtoi sfidat dhe transformimet në ekonominë globale, politikat monetare dhe të ardhmen e parasë në epokën digjitale, Guvernatori Ismaili ishte folës në panelin “Monedhat digjitale të qëndrueshme, pavarësia dhe e ardhmja e parasë”.
Në fjalën e tij, ai uroi Bankën e Shqipërisë për 100-vjetorin e themelimit, duke e cilësuar këtë jubile si një moment historik për sistemin financiar të mbarë rajonit dhe duke falënderuar për bashkëpunimin e ngushtë ndërinstitucional ndërmjet dy bankave qendrore.
Mundesh me e lexu edhe...
Guvernatori Ismaili theksoi se evolucioni digjital po transformon rrënjësisht mënyrën se si funksionojnë ekonomitë dhe shërbimet financiare, duke ndikuar në përfshirjen financiare, efikasitetin e pagesave dhe forcimin e stabilitetit financiar. Ai prezantoi reformat që Kosova ka ndërmarrë në këtë drejtim, përfshirë digjitalizimin e infrastrukturës së pagesave, zgjerimin e qasjes në financa, zbatimin e llogarisë bazike dhe projektet e rëndësishme si përafrimi me SEPA dhe implementimi i sistemit të pagesave të shpejta (TIPS Clone).
Në vazhdim, ai foli për kuadrin e ri rregullativ që synon forcimin e qëndrueshmërisë operacionale, sigurisë kibernetike dhe mbikëqyrjes së sistemeve financiare, në përputhje me standardet ndërkombëtare dhe me fokus në inovacion dhe stabilitet.
Sa i përket kripto-aseteve, Ismaili theksoi se BQK po ndjek një qasje të kujdesshme e të koordinuar me Fondin Monetar Ndërkombëtar (FMN) dhe Bankën Qendrore Evropiane, duke vëzhguar nga afër zhvillimet për Euron Digjitale me synimin për përfshirje në fazat e ardhshme.
Në përmbyllje, Guvernatori Ismaili theksoi se inovacioni financiar duhet të ecë krahas transparencës dhe edukimit financiar, ndërsa stabiliteti financiar, sovraniteti monetar dhe integriteti i sistemit financiar mbeten themeli i politikave të BQK-së./Katror.info
