A e dini se të premtet janë dita më pak produktive e javës?
Kjo është koha kur shumë njerëz fillojnë të ngadalësojnë ritmin në punë dhe kalojnë në atmosferën e fundjavës. Dërgohen më pak emaila, ka më pak takime dhe diskutohen planet për fundjavë, shkruan revista japoneze IDEAS FOR GOOD.
Duke marrë për bazë hulumtimet shkencore, një sipërmarrës filloi aktivitetet e Social Friday që i shndërron orët e humbura në punë komunitare.
Mundesh me e lexu edhe…
‘Social Friday’ është një lëvizje globale që inkurajon individët, ekipet dhe organizatat që t’i kushtojnë pasditet e së premtes kontributit ndaj shoqërisë, në vend që ta mbyllin javën në izolim ose në detyra rutinë zyre.
Kush qëndron pas saj?
Fikret Zendeli. Ai lindi dhe u rrit në Zvicër.
Ky inxhinier civil nga Maqedonia e Veriut, në 2017-ën, kur drejtonte kompaninë e tij ‘Breon’ në Cyrih, vërejti se të premteve pasdite, punëtorët nuk koncentroheshin e nuk ishin produktivë.
Kështu, vendosi të shfrytëzojë këtë kohë për të angazhuar ekipin e tij.
Tw premten pasdite, ekipi përfundon punë pak më herët dhe në vend që të shkojnë në shtëpi, zhvillojnë aktivitete si: pastrimi i ambienteve publike, ndihmë në strehimore për kafshët, aktivitete me fëmijë në nevojë, vizita në shtëpi të të moshuarve, mentorim dhe mësimdhënie, mbjellje pemësh dhe gjelbërim, shpërndarje ushqimi për njerëz në nevojë, organizimi i ngjarjeve kulturore ose sportive.
Ideja e Zendelit ka fituar njohje ndërkombëtare.
Në vitin 2021, ai prezantoi konceptin në një fjalim TEDx në Cyrih, i cili u përfshi në listën “Editor’s Pick” të YouTube, duke u renditur në 0.5% të fjalimeve më të shikuara globalisht.
‘E Premtja Sociale’ apo ‘Social Friday Activities’ tashmë praktikohet në vende si Austria, Zvicra, Norvegjia, Maqedonia e Veriut, Kosova, Shqipëria e SHBA.
Siç shkruan revista IDEAS FOR GOOD, shumë kompani investojnë në formën fizike të punonjësve të tyre duke subvencionuar tarifat e palestrës, ndërkohë që mbështetja për shëndetin mendor vazhdon të mungojë. Prandaj, Social Friday e pozicionon punën vullnetare si një “stërvitje mendore.”
Social Friday beson në fuqinë e ndryshimit.
Ideja është e thjeshtë, por e fuqishme: zëvendësoni disa orë pune joproduktive me angazhim domethënës shoqëror, vullnetarizëm dhe ndërtim komuniteti./Katror.info
