Korporata Energjetike e Kosovës (KEK sh.a.) ka bërë të ditur se aktualisht po prodhon rreth 400 MWh energji elektrike përmes dy njësive gjeneruese – B1 dhe A5, duke arritur një prodhim ditor prej 8208 MWh. Kjo sasi përbën rreth 83% të kërkesës ditore të deklaruar nga KESCO për Furnizuesin e Shërbimit Universal (FSHU), e cila është 9856 MWh, shkruan Katror.info.
Ndërkohë, në Termocentralin “Kosova B” është duke u zhvilluar një investim kapital për rehabilitimin e turbinave në njësinë B2, me vlerë mbi 56 milionë euro – investimi më i madh në këtë termocentral në më shumë se 40 vite. Po ashtu, ekipet profesionale të KEK janë duke punuar pa ndërprerje për rikthimin në operim të një njësie tjetër në Termocentralin “Kosova A”, për të rritur sigurinë dhe qëndrueshmërinë në furnizimin me energji.
Në një reagim zyrtar, KEK i është përgjigjur me shqetësim të lartë deklaratave publike të cilësuara si të pabazuara dhe të dëmshme për besimin ndaj sektorit energjetik. Korporata sqaron se projekti për rehabilitimin e njësisë A3 në vlerë 137.4 milionë euro është pjesë e Strategjisë së Energjisë 2023 dhe se ka ndjekur një proces të hapur dhe të rregullt të prokurimit, të menaxhuar përmes platformës së e-prokurimit, ku nuk është e mundur të dihet numri i aplikuesve para hapjes zyrtare të aplikimeve.
Mundesh me e lexu edhe…
KEK gjithashtu ka mohuar pretendimet për hezitim të bizneseve për të nënshkruar kontrata me Furnizuesin e Mundësisë së Fundit (FMF), duke theksuar se 55% e kontratave janë tashmë të nënshkruara. Deklaratat e kundërta, sipas KEK, përbëjnë keqinformim dhe tentativë për të ndikuar negativisht në përmbushjen e obligimeve ligjore.
Lidhur me tymosjen gjatë startimit të njësisë A5, KEK sqaroi se përdorimi i naftës ose mazutit në këtë fazë është praktikë e zakonshme teknike në të gjitha termocentralet që funksionojnë me linjit, dhe se tashmë njësia është plotësisht e stabilizuar.
KEK ka reaguar gjithashtu ndaj pretendimeve për sakrifikim të remonteve në emër të eksportit, duke nënvizuar se eksportet bëhen vetëm në rast të tepricave pas përmbushjes së plotë të kërkesave vendore dhe kryesisht gjatë orëve të natës.
Sipas KEK, të gjitha investimet kapitale, përfshirë ato në njësitë A3 dhe B2, po realizohen me mjete vetanake të korporatës, ndërsa është planifikuar edhe investimi nga Bashkimi Evropian për filtrat elektrik në vitin 2026/27, në vlerë mbi 100 milionë euro, për të cilin KEK ka kontribuar me mbi 20 milionë euro.
Korporata e ka quajtur të pavërtetë dhe dezinformuese edhe pretendimin se çmimi për megavat-orë i paguar nga konsumatorët ka qenë 800 euro. KEK ka theksuar se që nga viti 2013 nuk është më përgjegjëse për furnizimin me energji të konsumatorëve fundorë dhe nuk cakton çmime, pasi kjo kompetencë i përket KEDS/KESCO dhe rregullohet nga ZRRE.
Në përfundim, KEK ka bërë thirrje për ndalimin e deklaratave të pabazuara dhe spekulimeve që cenojnë imazhin e institucionit dhe stabilitetin e sektorit energjetik në vend. Korporata shpreh përkushtimin e saj për transparencë, profesionalizëm dhe furnizim të qëndrueshëm me energji për të gjithë qytetarët e Kosovës./Katror.info
