Inteligjenca artificiale është gjithandej, dhe industria e muzikës nuk bën përjashtim. Sipas Billboard, një këngëtare e krijuar nga AI, Xania Monet, është “arti AI i parë i njohur që ka arritur mjaftueshëm transmetim në radio për të debutuar në një listë muzikore të Billboard,” shkruan CNN, përcjell Katror.info.
Që nga debutimi i saj verën e vitit 2025, Monet ka shfaqur në disa lista të Billboard, përfshirë Hot Gospel Songs me këngën e saj “Let Go, Let God” dhe Hot R&B Songs me “How Was I Supposed to Know.”
Së fundmi, Monet ka nënshkruar një kontratë multi-milionëshe me Hallwood Media pas asaj që Billboard e quajti “një luftë ofertash.” Industria e Hollivudit ka shprehur shqetësime për ndikimin e mundshëm të performuesve AI që marrin vendin e njerëzve, siç u pa edhe në debatet e fundit rreth aktoreve AI, përfshirë Tilly Norwood. Megjithatë, përdorimi i AI në art vazhdon të rritet.
Mundesh me e lexu edhe...
Me mbi 146,000 ndjekës vetëm në Instagram, Monet tregon se publiku është gjithnjë e më i hapur ndaj konceptit, edhe pse industria mbetet e shqetësuar.
Profili i saj në Apple Music e përshkruan Monet si “një figurë AI e prezantuar si vokaliste R&B bashkëkohore, në stilin e shprehës, i rrënjosur në muzikën e kishës, i thjeshtë dhe i afërt me Keyshia Cole, K. Michelle dhe Muni Long.”
Xania Monet është krijuar nga Telisha Nikki Jones, një poete nga Mississippi, e cila shkruan tekstet që Monet performon me ndihmën e Suno, një program i krijimit të muzikës me AI. Në gusht, Monet publikoi albumin e saj të plotë “Unfolded” me 24 këngë, ndërsa në shtator ndoqi me një EP me shtatë këngë të titulluar “Pieces Left Behind.”
Një njoftim për shtyp nga përfaqësuesi i Monet e lavdëroi tingullin “e butë dhe soulful” dhe interpretimin “si njerëzor.” Romel Murphy, i cili thotë se është menaxheri i Monet dhe foli me CNN, siguroi se qëllimi nuk është të zëvendësohen këngëtarët dhe autorët njerëzorë.
“AI nuk zëvendëson artistin. Kjo nuk është aspak qëllimi ynë. Nuk zvogëlon krijimtarinë dhe nuk heq nga eksperienca njerëzore,” tha ai. “Është një hapësirë e re dhe, si çdo gjë, disa njerëz janë të hapur, disa të shqetësuar.”
Sipas Billboard, “vetëm në disa muajt e fundit, të paktën gjashtë artistë të AI ose të asistuar nga AI kanë debutuar në lista të ndryshme të Billboard.” Publikimi shton se ky numër mund të jetë më i lartë, pasi bëhet gjithnjë e më e vështirë të dallosh se kush ose çfarë është AI – dhe në çfarë mase.
Murphy nuk e sheh këtë si problem dhe e krahason me muzikën e Michael Jackson dhe Prince, të cilët vdiqën respektivisht në 2009 dhe 2016.
“Të dy kanë katalogë muzikorë që vazhdojnë të rriten edhe sot. Të rinjtë vazhdojnë t’i dëgjojnë ato këngë dhe ata nuk janë më me ne, por lidhen me muzikën e tyre,” tha ai. “Muzika duhet të evoluojë gjithashtu.”
Ndërkohë, muzikantët e vërtetë kanë shprehur shqetësim. Kehlani, për shembull, tha për Monet në një video të fshirë më pas nga TikTok: “Ka një artist AI R&B që sapo nënshkroi një kontratë multi-milionëshe … dhe personi nuk bën asgjë nga puna. Kjo është krejt jashtë kontrollit tonë.”
Këngëtarja shtoi: “Asgjë dhe askush në Tokë nuk do të mund të më bindë për AI”./Katror.info
