Korrje-shirjet e sivjetshme po japin rezultate të kënaqshme pothuajse në tërë territorin e Kosovës, falë farërave të grurit që tashmë prej disa kohësh prodhohen në vend. Madje, këto farëra nga Kosova, të kultivuara edhe në Shqipëri, po thyejnë rekorde me deri në 8,700 kilogramë për hektar. Ekspertët bujqësorë vlerësojnë se ngritja profesionale e fermerëve po ndikon në mënyrë të suksesshme në luftimin e sëmundjeve dhe dëmtuesve të grurit.
Kultivuesi i grurit, Arben Prekadini nga fshati Jashanicë i Klinës, thotë se këtë vit ka të mbjellë 10 hektarë me grurë, të destinuar për industrinë e bluarjes.
“Kam të mbjella dhjetë hektarë me grurë dhe shihet që këtë vit rendimenti është edhe më i lartë se vitin e kaluar, ndërsa edhe cilësia është shumë e mirë. Gjithashtu, këtë vit nuk patëm probleme me sëmundje, për shkak të trajtimeve profesionale që janë bërë për grurin,” tha Prekadini për emisionin ‘Toka’ në RTK.
Mundesh me e lexu edhe...
Megjithëse rendimenti dhe cilësia janë të mira, ai thekson se çmimi me të cilin po tregtohet gruri vendor është shumë më i ulët.
Në anën tjetër, Qëndrim Selimi, agronom me profesion dhe drejtues i fabrikës së farës së grurit në Klinë, që nga paslufta së bashku me familjen mbjell sipërfaqe të konsiderueshme me grurë të destinuar për farë, tha për ‘Toka’ se këtë vit kanë të mbjella 180 hektarë.
“Krahas grurit në përgjithësi, edhe gruri i destinuar për farë këtë vit ka rendiment dhe cilësi më të mirë se vitin e kaluar. Roli kyç ka qenë përzgjedhja e duhur e farës dhe trajtimi profesional i bimës,” tha Selimi.
Ai shtoi se ndryshimet klimatike kanë shtuar sëmundjet dhe dëmtuesit te gruri, por mbrojtja efektive po arrihet falë ngritjes së profesionalizmit të fermerëve.
“Farërat që prodhohen në vendin tonë, varësisht nga karakteristikat që kanë, janë pranuar mirë dhe po përdoren anembanë Kosovës, por edhe jashtë saj,” tha ai.
Fadil Musa, profesor universitar në Fakultetin e Bujqësisë dhe Veterinarisë, konfirmon rritjen e rendimentit dhe cilësisë këtë vit.
“Përveç rendimentit dhe cilësisë, ndikim ka pasur edhe ngritja profesionale e fermerëve. Kjo ka ndikuar që sëmundjet të menaxhohen mirë, dhe pjesa më e madhe e sipërfaqeve të mbjella të japin grurë të shëndoshë,” deklaroi Musa për RTK.
Sipas tij, përveç trajtimeve të mirëfillta, vetëdija e fermerëve është rritur edhe për analiza të tokës para mbjelljes si dhe për përzgjedhjen e farës cilësore dhe të certifikuar.
Ndërkohë, për shkak të cilësive pozitive, farërat që prodhohen në Kosovë tashmë kultivohen edhe në Shqipëri. Frano Palushaj nga Bushati i Shkodrës, i cili kultivon dhe tregton farërat e grurit nga Kosova, thotë se më së shumti përdoren dy varietete që prodhohen në fabrikën e grurit në Klinë, dhe të cilat po japin rezultate shumë të mira në Shqipëri.
“Krahas cilësisë dhe rendimentit, farërat e prodhuara në Kosovë janë përshtatur mirë edhe me klimën bregdetare të Shqipërisë. Rendimenti këtë vit është më i lartë se ai i vitit të kaluar,” tha Palushaj.
Rezultatet pozitive i konfirmon edhe fermeri tjetër nga Shqipëria, Florian Peci.
“Këto fara janë rezistente ndaj erërave të forta që janë të shpeshta në zonën e Bushatit ku jetoj. Rendimenti këtë vit ka arritur deri në 8,700 kilogramë grurë për hektar,” tha Peci për emisionin ‘Toka’./RTK/Katror.info
