Agjencia për Investime dhe Përkrahjen e Ndërmarrjeve në Kosovë (KIESA) ka lansuar një skemë të re financiare në vlerë prej 1 milion eurosh për mbështetjen e ndërmarrjeve mikro, të vogla dhe të mesme (NMVM) që veprojnë në sektorin e Teknologjisë së Informacionit dhe Komunikimit (TIK), shkruan Katror.info.
Skema e granteve, e cila u publikua më 17 qershor në platformën e-Kosova, ka për qëllim të mbështesë zhvillimin e produkteve të reja dhe përmirësimin e atyre ekzistuese, me fokus të veçantë në rritjen e kapaciteteve eksportuese të bizneseve vendore.
Ministrja në detyrë e Industrisë, Ndërmarrësisë dhe Tregtisë, Rozeta Hajdari, në ceremoninë e lansimit tha se kjo është një nismë e re që synon të fuqizojë sektorin e TIK-ut përmes inovacionit dhe zhvillimit të tregut.
Mundesh me e lexu edhe...
“Përmes kësaj skeme do të mbështeten ndërmarrjet që sjellin ide dhe projekte për krijimin e produkteve të reja apo përmirësimin e atyre ekzistuese, me qëllim rritjen e mundësive për eksport dhe integrim në tregjet ndërkombëtare,” u shpreh Hajdari.
Grantet do të jenë deri në 25 mijë euro për secilin projekt, ndërsa çdo tejkalim i kësaj vlere duhet të mbulohet nga vetë bizneset. Aplikimi është i hapur deri më 7 korrik 2025 dhe bëhet vetëm përmes platformës digjitale e-Kosova.
E drejta për të aplikuar u takon ndërmarrjeve që kanë aktivitetin e tyre kryesor ose dytësor në sektorin e TIK-ut, dhe që përmbushin kriteret e përcaktuara nga KIESA.
Me këtë hap, Qeveria e Kosovës synon të krijojë kushte më të favorshme për zhvillimin e inovacionit dhe konkurrueshmërisë në ekonominë digjitale të vendit./Katror.info
