Italia po ofron gjithashtu shërbime të veçanta trenash për sezonin e tartufit të bardhë, për korrjen e ullinjve dhe për Krishtlindje.
Duke filluar nga pranvera e vitit 2026, Venice Simplon-Orient-Express do të nisë për herë të parë itinerarin nga Parisi në Bregun e Amalfit. Ky udhëtim tre-netësh do të lidhë kryeqytetin francez me Ravellon, duke kaluar nëpër Rivierën Franceze dhe atë Italiane.
Venice Simplon-Orient-Express, i operuar nga Belmond, do ta prezantojë itinerarin Paris–Bregu i Amalfit më 4 maj 2026. Ky udhëtim është pjesë e serisë “Villeggiatura by Train”, që kombinon udhëtimet me tren gjatë natës me pushime luksoze në hotelet e Belmond nëpër Itali.
Mundesh me e lexu edhe…
Me qytetet e saj me ngjyra pastel, kodrat që përplasen në det dhe rrugët e mbushura me limonë e ullinj, Bregu i Amalfit është një nga destinacionet më magjike të Italisë – megjithëse shpesh kërkon udhëtime të ndërlikuara me autobusë e tragete. Ky itinerar i ri ofron një mënyrë më të ngadaltë, elegante dhe plot stil për të përjetuar la dolce vita.
Pasagjerët do të hipin në vagonët art deco të restauruar në Paris, ku do të mirëpriten me një gotë shampanjë, përpara se të akomodohen në kabinat historike ose në suitat e mëdha me banjo mermeri private. Darkat e mbrëmjeve do të shërbejnë pjata të frymëzuara nga rajonet që përshkon treni, të shoqëruara me kokteje dhe muzikë live në pianon e vagonit-bar.
Pas mëngjesit të ditës së dytë, treni do të mbërrijë në Pompeii për një vizitë të udhëhequr në sitin arkeologjik të lashtë. Udhëtarët në suitat luksoze do të kenë qasje private në Casa del Larario, një shtëpi e rrallë e shekullit II që zakonisht nuk është e hapur për publikun, e njohur për afresket dhe relievet e saj që përshkruajnë skena nga Lufta e Trojës.
Pjesa hekurudhore e udhëtimit përfundon në Ravello, ku mysafirët do të akomodohen në Caruso, hotel Belmond i vendosur në një pallat të shekullit XI mbi Detin Tirren. Qëndrimi dy-ditor përfshin një festë private pranë pishinës me pamje nga deti dhe një darkë gala në kopshtet panoramike.
Eksperienca është e jashtëzakonshme, por edhe e kushtueshme: çmimet fillojnë nga 10 mijë euro për person, duke përfshirë të gjitha vaktet, udhëzimet dhe transferimet.
Italia po përjeton një rilindje të udhëtimeve të ngadalta me tren, me linja të reja që ofrojnë përvoja autentike kulturore.
Në Toskana, një tren vintage i viteve ’70 udhëton nga Roma në Siena deri në nëntor, duke ndaluar në vreshta dhe qytete kodrinore. Ndërkohë, Espresso Langhe e Monferrato transporton pasagjerë nga Roma në Alba çdo fundjavë të tetorit, pikërisht gjatë festivalit të tartufit të bardhë.
Një tjetër linjë, Espresso Assisi: Frantoi Aperti Edition, çon udhëtarët në Umbria për të shijuar vaj ulliri me degustime të udhëhequra brenda trenit.
Pas suksesit të linjës Monaco Express për Oktoberfest, treni do të rikthehet në dhjetor për të lidhur Romen me Mynihun për sezonin e tregjeve të Krishtlindjeve, me ndalesa në Verona dhe Innsbruck./Ap/Katror.info
