Nëse ndonjëherë keni provuar gatime pa gluten, ose keni shijuar biskota amaretti, me siguri jeni tashmë fans i miellit të bajames. Por mielli i bajames është vetëm një yll i vogël në universin e gjerë të miellrave të arrave.
Më pak të njohura, por po aq të vlefshme janë miellrat e bërë nga arrat e zakonshme, lajthitë, fëstëkët apo gështenjat. Këto janë të pasura me lëndë ushqyese, kanë aromë intensive dhe i japin karakter çdo gatimi.
Megjithatë, janë shpesh më të shtrenjta se miellrat me bazë drithi, ndaj para se t’i mbushni raftet me to, është e rëndësishme të kuptoni si funksionojnë ndryshe nga mielli i grurit, çfarë mund dhe çfarë nuk mund të bëjnë.
Mundesh me e lexu edhe...
Mielli i arrave përfitohet nga arra të plota të bluara imët deri në një teksturë si pluhur. Shumë produkte të gatshme përgatiten me arra të ziera paraprakisht (të qëruara nga lëkura), për të dhënë një teksturë më të lehtë dhe ngjyrë të çelët, të ngjashme me miellin e zakonshëm.
Çfarë shton mielli i arrave në receta?
Miellrat e arrave shtojnë lagështi në brumëra, pasi përmbajnë më shumë vaj sesa miellrat me bazë drithi. Kjo është veçanërisht e përshtatshme për tortat, kekët dhe brumërat e butë, ku kërkohet një strukturë e dendur dhe e lagësht.
Autorja e librave të gatimit Aran Goyoaga, thekson se miellrat e arrave nuk janë të përshtatshëm për biskota krokante, por mund të përdoren në sasi të vogla për aromë — si te biskotat Linzer, ku mielli i lajthisë i jep shije pa ndikuar në strukturë.
Ajo gjithashtu i përdor në brumë për baza tortash apo për lëkurat e ëmbëlsirave me thërrime. Përtej ëmbëlsirave, miellrat e arrave mund të përdoren edhe në pije, në salca me bazë bajamesh, apo në kroasantë me bajame.
Nga ana ushqyese, këto miellra shtojnë proteina, fibra dhe yndyra të shëndetshme, duke e bërë çdo recetë më të pasur.
Ndonëse arrat kanë shumë proteina, ato nuk përmbajnë gluten apo proteina lidhëse, të cilat i japin elasticitet dhe strukturë bukës së zakonshme. Megjithatë, për të shtuar shije arrash në brumë buke, ajo rekomandon pak miell gështenje, pasi ai përmban karbohidrate që ndihmojnë procesin e fermentimit.
Në disa receta të krijuara posaçërisht për këtë qëllim, mielli i arrave funksionon në mënyrë të shkëlqyer.
Por në shumicën e rasteve, zëvendësimi i plotë i miellit të zakonshëm me atë të arrave nuk jep rezultat të mirë.
Zgjidhja më e mirë është kombinimi i miellrave pa gluten me miell arrash, për të marrë teksturë dhe aromë të balancuar.
Këshilla e ekspertëve: Për kekë dhe brumëra të butë, mund të zëvendësoni deri në 50% të miellit me miell arre, ndërsa për biskota krokante rekomandohet të mos përdorni më shumë se 25%.
A mund ta përgatisni vetë miellin e arrave?
Po. Mielli i blerë ka teksturë më të njëtrajtshme, por bluarja në shtëpi është më e lirë dhe më e freskët. Thjesht bluani arrat në një mikser të fuqishëm , dhe shtoni pak miell orizi ose gruri për të thithur vajrat e tepërt gjatë procesit.
Ruani arrat në ngrirje dhe bluajini vetëm në sasinë që ju nevojitet për recetën.
Për ata që kërkojnë shijen e arrave pa rrezikun e alergjisë, ekziston mielli i “tiger nut” (arra tigër) – në fakt, një zhardhok dhe jo arrë e vërtetë. /AP/Katror.info
