Ministria e Financave, Punës dhe Transfereve ka miratuar udhëzuesin e përditësuar për zbatimin e skemave të Shtesave për Fëmijë dhe Lehona.
Sipas njoftimit të Ministrisë, udhëzuesi përcakton kriteret, procedurat e aplikimit dhe rastet specifike për përfitim nga këto skema sociale, me qëllim mbështetjen financiare të familjeve dhe nënave rezidente në Kosovë.
Në njoftim thuhet se të gjithë fëmijët nga mosha 0 deri në 16 vjeç, që janë rezidentë në Kosovë, kanë të drejtë të përfitojnë shtesa mujore. Theksohet se familjet me një ose dy fëmijë përfitojnë nga 20 euro në muaj për secilin fëmijë, ndërsa familjet me tre ose më shumë fëmijë përfitojnë nga 30 euro për fëmijë në muaj.
Ministria bën të ditur se aplikimi duhet të bëhet nga nëna e fëmijës përmes platformës eKosova, dhe pagesat transferohen në llogarinë bankare të saj. Në raste kur nëna ka ndërruar jetë, nuk është shtetase e Kosovës apo nuk mund të aplikojë, thuhet në udhëzues se babai ose kujdestari ligjor mund të aplikojë, me dokumentacion përkatës.
”Aplikimi bëhet nga nëna e fëmijës përmes platformës eKosova, dhe mjetet kalojnë në llogarinë e saj bankare”, theksohet në njotim.
Sipas Ministrisë, aplikimi mund të bëhet edhe nga babai në situata të veçanta si prindër të divorcuar, braktisje nga nëna, apo kur kujdestaria është dhënë me vendim të gjykatës apo nga Qendra për Punë Sociale.
Gjithashtu, në rastet kur fëmija është në strehim rezidencial, theksohet se aplikimi bëhet nga institucioni strehues përmes një punonjësi të autorizuar që hap llogari bankare në emër të fëmijës.
Për sa i përket lehonave, në njoftim thuhet se të drejtë për përfitim kanë të gjitha gratë rezidente në Kosovë që kanë lindur fëmijë, me përfitime të ndryshme sipas statusit të punësimit. Lehonat e papuna përfitojnë 325.9 euro në muaj për gjashtë muaj rresht, ndërsa ato të punësuara përfitojnë të njëjtën shumë për tre muaj me radhë.
”Lehonat e papuna – përfitojnë 325.9€ në muaj për 6 muaj me radhë, nëse kanë qenë të papuna për së paku 9 muaj nga 12 muajt e fundit para lindjes (sipas të dhënave të ATK).Lehonat e punësuara – përfitojnë 325.9€ për 3 muaj me radhë”, thuhet ndër të tjerash në njoftim.
Ministria thekson se aplikimi për këtë skemë duhet të bëhet brenda 90 ditëve nga data e lindjes së fëmijës. Në rast se aplikimi për shtesat bëhet brenda tre muajve pas lindjes së fëmijës në Kosovë, përfitimi miratohet automatikisht. Në rastet tjera, si lindje jashtë Kosovës apo aplikim pas afatit, lënda i nënshtrohet verifikimit shtesë.
Sipas udhëzuesit, dokumentet që mund të kërkohen gjatë verifikimit përfshijnë certifikatën e vendbanimit, dëshmitë nga shkolla dhe institucionet shëndetësore, faturat e rrymës dhe regjistrimin e bashkësisë familjare në ASK. Në mungesë të dokumentacionit të kërkuar, thuhet se përfitimi mund të pezullohet ose të ndërpritet.
Përfituesit kanë të drejtë të ankohen në Komisionin e Ankesave brenda 30 ditëve nga marrja e vendimit në rast se përfitimi u pezullohet apo ndërpritet pa një vendim të arsyetuar.
Për më shumë detaje rreth procedurës së aplikimit dhe kritereve për përfitim, Ministria udhëzon qytetarët të vizitojnë platformën zyrtare përmes vegëzës: https://mfpt.rks-gov.net/…/6a0302bd-eec7-4525-8e17…/Katror.info
Përgatiti:
