Ministria e Industrisë, Ndërmarrësisë dhe Tregtisë (MINT), përmes Agjencisë për Investime dhe Përkrahjen e Ndërmarrjeve në Kosovë (KIESA), ka mbajtur sot një sesion informues me përfaqësues të bizneseve, me rastin e lansimit të thirrjes publike për mbështetje financiare të Ndërmarrjeve Mikro, të Vogla dhe të Mesme (NMVM) për certifikim të produkteve, shkruan Katror.info.
Skema e grantit, me një buxhet prej 600,000 euro, synon të mbështesë ndërmarrjet vendore për të siguruar certifikime ndërkombëtare për produktet e tyre – certifikime të cilat aktualisht nuk mund të realizohen në Kosovë. Kjo përkrahje ka për qëllim të lehtësojë qasjen e bizneseve kosovare në tregjet ndërkombëtare dhe të nxisë rritjen e eksportit të mallrave dhe shërbimeve.
Ushtruesi i detyrës së Drejtorit të Përgjithshëm të KIESA-s, Zef Dedaj, theksoi rëndësinë e kësaj skeme për fuqizimin e sektorit privat dhe për rritjen e kapaciteteve konkurruese të bizneseve në tregun global. Ai inkurajoi ndërmarrjet që të aplikojnë dhe të përfitojnë nga kjo mundësi për zhvillim dhe avancim profesional.
Gjatë sesionit informues, pjesëmarrësit u njohën në detaje me kushtet e aplikimit, kriteret e pranueshmërisë dhe dokumentacionin e nevojshëm. U prezantua gjithashtu udhëzuesi për aplikim dhe u dhanë sqarime praktike mbi mënyrën e aplikimit përmes platformës elektronike e-Kosova. Pjesëmarrësit patën gjithashtu mundësinë të parashtrojnë pyetje dhe të marrin përgjigje direkte nga zyrtarët e KIESA-s.
Thirrja për aplikim është e hapur deri më 25 qershor 2025, ndërsa aplikimi bëhet ekskluzivisht përmes platformës: https://ekosova.rks-gov.net/501.
/Katror.info
