Gjatë mbledhjes së qeverisë të enjten, Kryeministri në detyrë, Albin Kurti, ka njoftuar për një rritje të dytë të pagave për shërbyesit civilë me 55 euro të tjera, duke filluar nga muaji korrik, raporton Ekonomia Online. Kjo vjen pas rritjes së parë prej 55 eurosh që ka hyrë në fuqi që nga janari i këtij viti.
“Lajmi i tretë i mirë: pagat e shërbyesve publikë do të rriten dy herë nga 55 euro. Rritja e parë ka hyrë në fuqi nga janari i këtij viti, ndërsa rritja e dytë do të fillojë nga korriku. Sot do të marrim vendimin për mbulimin e kostos së kësaj rritjeje,” deklaroi Kurti.
Sipas tij, mbi 80 mijë zyrtarë publikë do të përfitojnë nga kjo rritje, duke e çuar totalin e shtesës në paga në 110 euro më shumë krahasuar me muajin dhjetor të vitit 2024.
Mundesh me e lexu edhe…
Në të njëjtën mbledhje, Qeveria në detyrë miratoi Propozim-vendimin për ndarjen e mjeteve buxhetore, në përputhje me nenin 33, paragrafi 2 i Ligjit Nr. 08/L-332 për Ndarjet Buxhetore për vitin 2025.
Ministri i Financave, Hekuran Murati, tha se është bërë ndarja e mjeteve për të mbuluar fazën e dytë të rritjes së pagave në sektorin publik. “Në ligjin për ndarjet buxhetore është paraprë rritja e pagave në dy faza. Faza e parë ka filluar të aplikohet, sot po marrim vendim për ndarjen e mjeteve buxhetore për të gjitha organizatat buxhetore, për të mbuluar koston e rritjes së koeficientit për fazën e dytë,” sqaroi Murati.
Sipas tij, fondi për këtë rritje kap vlerën mbi 31.2 milionë euro, duke mundësuar kështu përmbushjen e zotimit për një rritje totale prej 110 euro për të gjithë shërbyesit publikë që marrin pagë nga buxheti i shtetit./Katror.info
