Nëse të ka ndodhur të shikosh nga dritarja një ditë të bukur me diell dhe të ndjesh faj që po qëndron brenda, nuk je i vetmi. Kjo ndjenjë tashmë quhet “faji i diellit” dhe është bërë pjesë e fjalorit të kohës moderne – veçanërisht tani kur rrjetet sociale janë plot me foto shëtitjesh në natyrë dhe mëngjeseve në verandë.
Por çfarë është në të vërtetë “faji i diellit”? Dhe a duhet ta marrim kaq për zemër?
“Faji i diellit është ndjenja e keqardhjes që kemi kur qëndrojmë brenda në një ditë me mot të mirë, në vend që të dalim e ta shfrytëzojmë atë,” shpjegon Dr. Douglas J. Opler, profesor i psikiatrisë në Rutgers New Jersey Medical School. Edhe pse nuk është një term zyrtar psikologjik, shumica prej nesh e përjetojnë.
Pse ndihemi fajtorë që rrijmë brenda?
Kjo ndjenjë vjen nga shumë arsye – pritshmëri personale, mesazhe që kemi marrë që të vegjël (“dil jashtë, mos rri brenda!”), dëshira për të ushtruar më shumë, apo edhe rrjetet sociale që e bëjnë jetën në natyrë të duket si një botë perfekte.
Por le të mos harrojmë se ka shumë arsye të vlefshme për të qëndruar brenda: puna, lodhja, përkujdesja për familjen, apo thjesht kënaqësia nga aktivitetet që bëjmë në shtëpi. Dhe nuk ka asgjë të keqe në këtë.
A është keq të ndjesh “fajin e diellit”?
Jo fare. Është krejt normale të ndjesh çdo emocion. E rëndësishme është të mos e gjykojmë veten për këtë. “Emocionet janë të natyrshme dhe më mirë t’i pranojmë, sesa të mundohemi t’i shmangim,” thotë Dr. Philip J. Fizur, psikolog klinik.
Nëse ndihesh kështu, mjafton ta vësh re këtë ndjenjë pa e kritikuar veten. Mund ta shohësh edhe si mundësi për të reflektuar mbi çfarë të bën vërtet mirë.
Si ta zbusim këtë ndjenjë?
Në vend që ta lëmë fajin të na pushtojë, mund ta përdorim si motivim për të organizuar diçka të vogël herën tjetër – ndoshta një kafe në verandë, një shëtitje të shkurtër pas darke apo një drekë të shpejtë jashtë.
Disa këshilla praktike:
Hap dritaret dhe nuhat erën e freskët.
Bëj një premtim për një shëtitje të vogël nesër.
Lëre telefonin dhe qëndro për pak nën hijen e një peme.
Shkëputu për pak nga rrjetet sociale – aty zakonisht “faji i diellit” duket edhe më i madh.
Kur duhet të shqetësohemi?
Nëse kjo ndjenjë shoqërohet me trishtim të zgjatur, lodhje, vështirësi me gjumin apo humbje interesi për gjërat që të kanë pëlqyer, atëherë mund të jetë mirë të flasësh me një mik të besueshëm ose një profesionist.
Në fund të ditës…
Edhe nëse ndonjëherë ndihesh fajtor që nuk shfrytëzon diellin, mos harro: mirëqenia jote është më e rëndësishmja. Edhe një ditë e qetë në shtëpi është e vlefshme. Jeto sipas ritmit tënd, pa krahasime. /Katror.info
Përgatiti:
