Aktorja suedeze Alicia Vikander do të rikthehet në teatër pas 17 vitesh, duke debutuar për herë të parë në skenën britanike në një prodhim të ri të dramës së Henrik Ibsen, Zonja nga Deti (The Lady from the Sea).
Vikander, e njohur për rolet në filma si Tomb Raider, Ex Machina dhe The Danish Girl – për të cilin fitoi edhe çmimin Oscar – nuk ka interpretuar në teatër që nga adoleshenca. “Jam e emocionuar dhe e frikësuar njëkohësisht – është hera e parë që dal në skenë si e rritur,” tha ajo për BBC News, përcjell Katror.info.
Shfaqja do të vihet në skenë në Bridge Theatre në Londër, duke nisur më 10 shtator dhe do të zgjasë për tetë javë. Pjesa është përshtatur dhe do të drejtohet nga regjisori i njohur Simon Stone, ndërsa përkrah Vikander do të luajë edhe Andrew Lincoln nga The Walking Dead.
Në këtë prodhim, Vikander do të interpretojë Ellida-n, bijën e një rojëtari të farit, e martuar me një mjek norvegjez, por e përballur me kthimin e papritur të një dashurie të vjetër që do t’i trazojë botën.
Ajo e cilëson bashkëpunimin me Stone si një “përputhje perfekte” duke përmendur edhe lidhjen e saj personale me trashëgiminë skandinave dhe teatrin, pasi nëna e saj ishte aktore e skenës.
“E kam pritur për vite këtë moment, dhe tani më në fund po ndodh,” thotë Vikander, duke shtuar se emocionet dhe dilemat e personazhit të saj janë ende të pranishme edhe te gratë sot.
Produksioni i Zonja nga Deti përbën një tjetër interpretim modern të veprave të Ibsen-it në Londër, pas suksesit të Armikut të Popullit me Matt Smith dhe The Master Builder me Ewan McGregor./Katror.info
