Kompania OpenAI ka prezantuar zyrtarisht “ChatGPT Atlas”, një shfletues i ri i fuqizuar nga inteligjenca artificiale, që synon të sfidojë dominimin global të Google Chrome. Sipas Reuters, lançimi vjen në një kohë kur përdoruesit po orientohen gjithnjë e më shumë drejt mjeteve të bisedës për të kërkuar dhe përpunuar informacion, në vend të rezultateve klasike të bazuara në fjalë kyçe, raporton Katror.info.
“Atlas” është ndërtuar rreth ChatGPT-së, asistentit inteligjent me 800 milion përdorues aktivë çdo javë, dhe ofron funksione të avancuara si përmbledhje përmbajtjeje, krahasime produktesh dhe automatizim të plotë të detyrave.
Përdoruesit me abonim mund ta përdorin atë edhe në “modalitetin agjent”, ku ChatGPT ndërvepron me faqet në internet për të kryer veprime të plota – për shembull, kërkimi i një recete dhe blerja automatike e përbërësve përmes faqes Instacart.
Mundesh me e lexu edhe...
Aktualisht, Atlas është i disponueshëm në mënyrë globale për sistemin macOS të Apple. Versionet për Windows, iOS dhe Android pritet të lansohen së shpejti.
Garë e ashpër në tregun e AI
Ky zhvillim e vendos OpenAI në një pozicion të ri konkurrues ndaj Google, e cila ende mban 71.9% të tregut global të shfletuesve (sipas të dhënave të StatCounter për shtatorin). Gjithsesi, analistët theksojnë se integrimi i një asistenti të fuqishëm si ChatGPT në një shfletues mund të ndikojë ndjeshëm në tregun e reklamave online, të cilin aktualisht Google e dominon me rreth 90% të shpenzimeve për reklama në kërkim.
“Integrimi i bisedës në një shfletues është një hap drejt fillimit të shitjes së reklamave nga OpenAI, diçka që ende nuk ka ndodhur. Kjo mund t’i marrë një pjesë të konsiderueshme Google-it,” tha analisti Gil Luria nga D.A. Davidson.
Në të njëjtën kohë, Google ka përforcuar integrimin e modelit të vet AI, Gemini, në shfletuesin Chrome në SHBA dhe planifikon ta zgjerojë atë në platformat mobile. Ndërkohë, një vendim gjykate në shtator i dha një fitore të përkohshme Google-it, duke lejuar kompaninë të vazhdojë të promovojë motorin e saj të kërkimit përmes partneriteteve komerciale.
Një fushë gjithnjë e më e mbushur me konkurrentë
“Atlas” nuk është i vetmi në këtë garë. Ai bashkohet me shfletues të tjerë të fuqizuar nga AI si Comet i Perplexity, Brave dhe Neon i Opera-s. Por lansimi nga OpenAI – me përvojën e saj të suksesshme në ChatGPT që prej vitit 2022 – mund të ndryshojë ekuilibrat në një treg tashmë të mbushur.
Drejtuesi i OpenAI, Sam Altman, ka theksuar më parë se e ardhmja e kërkimit online qëndron në ndërveprimin natyror me informacionin – një vizion që “Atlas” duket se e përfaqëson./Katror.info
