Një grup organizatash ndërkombëtare, përfshirë Unionin Evropian të Transmetuesve (EBU), Federatën Evropiane të Gazetarëve (EFJ) dhe Reporters Without Borders, kanë dërguar një letër zyrtare kryeministrit të Kosovës, Albin Kurti, duke shprehur shqetësimin e tyre për krizën financiare, menaxheriale dhe të qeverisjes në Radio Televizionin e Kosovës (RTK).
Në letrën e tyre, organizatat theksojnë se RTK operon pa buxhet të miratuar, pa bord të plotë dhe pa Drejtor të Përgjithshëm të emëruar ligjërisht. Situata ka bërë që punonjësit të mos marrin paga, duke nxitur protesta dhe tensione sociale.
Organizatat ndërkombëtare kërkojnë që qeveria të lirojë menjëherë fondet e RTK-së për pagesën e pagave dhe që Kuvendi të rivendosë strukturat ligjore të qeverisjes, përfshirë emërimin e anëtarëve të mbetur të Bordit dhe zgjedhjen e Drejtorit të Përgjithshëm.
Mundesh me e lexu edhe...
Letra vë në dukje gjithashtu shqetësimet e Raportit të Progresit të Komisionit Evropian 2025 për Kosovën, i cili evidenton mungesën e një modeli të qëndrueshëm financiar për RTK-në dhe rrezikun e ndikimit politik mbi mediën publike.
Organizatat theksojnë se masat urgjente do të ishin një demonstrim i angazhimit të Kosovës ndaj vlerave evropiane dhe standardeve të lirisë së medias, të nevojshme për anëtarësimin e ardhshëm në Këshillin e Evropës dhe Bashkimin Evropian./Katror.info
