E përditësuar 19:48.
Presidentja ka mandatuar kandidatin e VV, Glauk Konjufca, për kryeministër, duke theksuar se detyrimi i saj ishte të vlerësonte se kush ka më shumë gjasa për të siguruar shumicën e votave.
Ajo shtoi se Konjufca dhe partia e tij kanë besim të plotë se mund t’i arrijnë votat e nevojshme, dhe këtë e ka marrë parasysh në vendimin e tij.
Mundesh me e lexu edhe…
“Detyrimi im është për të parë se kush i ka nga ata gjasat më të mëdha, VV dhe kandidati Konjufca kanë besim të plotë se mund të arrijnë votat e nevojshme por kjo i takon atyre të bëjnë votat. Mua më takon që të bindem që kanë gjasa dhe mua më kanë bindur që kanë gjasa dhe e kam zbatuar këtë detyrim në përputhje me aktgjykimin e Kushtetutës”, theksoi ajo.
Osmani ndër të tjera tha se është në interes i përgjithshëm i vendit që të kemi institucione dhe të bëhet çdo përpjekje e mundshme që ato të krijohen në atë mënyrë që të miratohen vendimet e rëndësishme në interes të qytetarëve.
“Ndër qëllimet kryesore ka qenë që të kemi mundësi të miratojmë zgjatjet buxhetore ose edhe buxhetin në tërësi në qoftë se kemi dakordim ndërmjet partive. Mbi të gjitha ta miratojmë Planin e Rritjes nga i cili Kosova përfiton mbi 800 milionë euro. Është edhe marrëveshja me Bankës Botërore në vlerë prej 100 milionë euro, po flasim për gati 1 milion euro”, tha ajo.
Sipas Kushtetutës, mandatari ka afat 15 ditë për t’i prezantuar Kuvendit përbërjen e re të ekzekutivit që duhet të marrë mbështetjen e të paktën 61 deputetëve për t’u zgjedhur.
Më 26 tetor, përpjekja për formimin e Qeverisë “Kurti 3” dështoi. Kryeministri në detyrë Albin Kurti mori vetëm 56 nga 61 votat e nevojshme.
Osmani mandaton Konjufcën për formimin e Qeverisë
Presidentja e Kosovës, Vjosa Osmani, në konferencën për media ka deklaruar se opozita ia ka bërë të qartë se nuk do të dërgojë emër për mandatar, raporton Katror.info.
“Në përputhje me Kushtetutën e Republikës së Kosovës dhe me kompetencat e mia si presidente e vendit, sapo ishin certifikuar zgjedhjet kam filluar seancën e parë. Për shkak të mungesës së konstituimit të Kuvendit, jam angazhuar me partitë politike për të gjetur rrugën përpara për konstituimin e tij. Fatkeqësisht, ky proces zgjati shumë, duke i humbur Kosovës gati një vit të tërë.
Pas konstituimit të Kuvendit, menjëherë të nesërmen kam mandatuar të propozuarin e parë, ashtu siç e kërkon Kushtetuta. Kam ftuar partitë politike për të diskutuar lidhur me mandatarin tjetër. Në atë takim, ashtu si edhe në takimet e sotme, më është bërë e qartë se ata nuk do të propozojnë një emër tjetër për mandatar. Gjuha e përdorur në Kushtetutë është obligative që ta emëroj mandatarin e dytë. Nuk kemi asnjë propozim tjetër, përveç atij nga partia e parë; për këtë arsye, në përputhje me Kushtetutën, kam mandatuar një kandidat tjetër për kryeministër.”
Osmani tha se ka konstatuar se verdiktin final në qoftë se i mandatuari për kryeministër i ka votat e nevojshme për shumicë apo jo e japin 120 deputetët e Kosovës.
Lëvizja Vetëvendosje e udhëhequr nga Albin Kurti më herët gjatë ditës e propozoi Konjufcën për mandatar për Qeverinë e re të Kosovës, duke dërguar emrin e tij për mandatim te presidentja.
