Presidentja e Kosovës, Vjosa Osmani, ka vlerësuar se aktgjykimi i Gjykatës Kushtetuese nuk e ka përjashtuar si mundësi votimin e fshehtë për kryekuvendarin në seancën konstituive, por që ka kërkuar që fillimisht të ketë konsensus për këtë çështje.
“Ky është konstatimi i një analize disa ditore të këtij aktgjykimi nga një grup ekspertësh profesionistësh brenda e jashtë vendit, të cilët vazhdimisht më këshillojnë në këtë fushë – pra që lejohet si mundësi, por para se të shkojmë te një hap i tillë duhet patjetër të ketë vendim të seancës. Duhet të pyetet Kuvendi, deputetë a jeni pro një vendimi të tillë apo jo”, tha Osmani në një prononcim të shkurtër për media.
Në vlerësimin e Osmanit mund të ketë pasoja juridike në rast se Kuvendi i Kosovës nuk konstituohet më së voni deri më 26 korrik, siç sugjeroi Gjykata Kushtetuese.
Mundesh me e lexu edhe...
“Në qoftë se ata nuk e kryejnë këtë funksion brenda 30 ditësh, që do të thotë konstituimin e Kuvendit dhe realizimin e detyrimit të tyre kushtetues që të jenë përfaqësues të popullit, kjo është një nga shkeljet më të rënda që nga dita kur Kushtetuta e Kosovës është miratuar”, ka shtuar ajo.
Ndryshe Osmani, të mërkurën priti në takim kryetarin e Lëvizjes Vetëvendosje, Albin Kurtin, kryetarin e Partisë Demokratike të Kosovës, Memli Krasniqi, kryetarin e Lidhjes Demokratike të Kosovës, Lumir Abdixhiku, si dhe atë të Aleancës për Ardhmërinë e Kosovës, Ramush Haradinaj – në përpjekje për të ndihmuar në gjetjen e një zgjidhjeje për të dalë nga kriza institucionale.
Kosova është pa institucione të reja edhe katër muaj pas mbajtës së zgjedhjeve parlamentare, pasi deputetët kanë dështuar ta konstituojnë Kuvendin në 40 përpjekje radhazi.
Ky është takimi i dytë i Osmanit me liderët politikë dhe vije pas aktvendimit të Gjykatës Kushtetuese e cila propozoi që konstituimi i Kuvendit të Kosovës duhet të përfundojë më së voni deri më 26 korrik./Albanian Post/Katror.info
