Presidentja e Kosovës, Vjosa Osmani, ka bërë të ditur se nëse nuk ka një marrëveshje për formimin e Qeverisë së re të vendit në seancën e së dielës ajo do të ftojë partitë për të parë nëse ndonjëra mund të sigurojë 61 votat e nevojshme.
“Nëse s’ka marrëveshje, atëherë si presidente do t’i ftoj të gjitha partitë politike për të parë nëse ka mundësi që dikush ta krijojë shumicën”, deklaroi Osmani në një intervistë për Deutsche Welle.
Më 26 tetor përfundon afati kushtetues 15 ditor për formimin e qeverisë së re. Lëvizja Vetëvendosje si partia e cila doli e para në zgjedhjet parlamentare të 9 shkurtit të dielën pritet të matet – a i ka numrat apo jo.
Mundesh me e lexu edhe…
Mandatari i kësaj partie, Albin Kurti, ditë më parë, bëri të ditur se ekziston mundësia që LVV-ja të dështojë në formimin e institucioneve të reja. Ai vlerësoi se ka shumë vështirësi për të siguruara numrat, për shkak, siç tha ai, “xhelozisë, inatit e cinizmit”.
Paçka, ai fajësoi ish-opozitën se nuk ka vullnet për formimin e qeverisë së re. Sipas tij, e vetmja zgjidhje, gjithë në këtë mes, janë zgjedhjet e parakohshme.
Mandatari ka 15 ditë kohë për të dorëzuar përbërjen e Qeverisë dhe për të kërkuar miratimin e saj nga Kuvendi. Qeveria e propozuar duhet të sigurojë të paktën 61 vota nga 120 deputetë për t’u miratuar.
Në rast se nuk arrihet kjo shumicë, presidentja e Kosovës, Vjosa Osmani, ka detyrimin që brenda 10 ditëve të zhvillojë konsultime të reja me partitë dhe të vendosë për mandatarin me gjasat më të mëdha për formimin e qeverisë.
Megjithatë, Partia Demokratike e Kosovës, si partia e dytë pas LVV-së, duket se nuk e ka ndërmend të tentojë për t’i bërë numrat për krijimin e institucioneve të reja.
Nënkryetarja e PDK-së, Vlora Çitaku, ka potencuar se PDK-ja ka kuptuar që ka mungesë të numrave dhe se zgjedhjet e reja janë të pashmangshme.
Në anën tjetër, kryetari i Lidhjes Demokratike të Kosovës, Lumir Abdixhiku, ka mohuar në mënyrë kategorike mundësinë e ndonjë kontakti apo bashkëpunimi me Lëvizjen Vetëvendosje për krijimin e institucioneve të reja.
Ai ka deklaruar se qëndrimi i LDK-së mbetet i pandryshuar dhe se të gjitha zërat për një koalicion të mundshëm janë spekulime.
Ndërkaq Deputeti i Aleancës për Ardhmërinë e Kosovës, Daut Haradinaj, ka potencuar se partia e tij nuk do ta mbështesë Albin Kurtin për një mandat të ri në krye të Qeverisë.
Sipas Haradinajt, asnjë nga deputetët e AAK-së nuk do të japë votë për Kurtin, madje as nëse në këmbim do t’u ofrohej posti i presidentit të vendit.
Për zgjedhje të parakohshme është edhe nënkryetari i Kuvendit të Kosovës nga radhët e komunitetit serb, Nenad Rashiç, meqë sipas tij, aktualisht nuk ka shumë gjasa për arritjen e një marrëveshjeje për krijimin e qeverisë.
Nëse zgjedhjet bëhen të pashmangshme, sipas Rashiç, ato mund të organizohen në fund të janarit ose në fillim të shkurtit të vitit të ardhshëm.
Nëse Qeveria nuk mund të formohet as pas përpjekjes së dytë, Kushtetuta kërkon shpalljen e zgjedhjeve të reja brenda 40 ditësh.
Lëvizja Vetëvendosje, që doli e para nga zgjedhjet e 9 shkurtit, ka 48 deputetë në Kuvend. Asaj i duhen edhe 13 deputetë për të formuar qeverinë me 61 vota./Albanian Post/Katror.info
