Pas pesë ditësh intensive garash, plot ritëm, pasion dhe emocione, turneu ndërkombëtar WTT Feeder Prishtina 2025 u përmbyll me ndeshjet finale në Pallatin e Rinisë dhe Sporteve në Prishtinë.
Pjesëmarrës nga e gjithë bota, nga kontinentet më të ndryshme, sjellën energji unike dhe nivel të lartë konkurrence në këtë edicion të dytë të organizuar në zemër të Kosovës, shkruan Katror.info.
“Është shumë e rëndësishme të jem këtu sepse në Evropë nuk kemi aq shumë tournamente, poashtu është në qendër të qytetit, mund ta shijojmë pak, të shkojmë në restaurante, të ecim, është tournament shumë i mirë.” -u shpreh Camille Lutz, lojtare nga Franca.
Mundesh me e lexu edhe...
Video të Highlights (momentet më të mira) të përgatitura nga Katror Media si Partner Medial i WTT Prishtina 2025 – Mundësuar nga Federata e Pingpongut e Kosovës.
Elias Ranefur, lojtar nga Suedia, surprizoi me lojën e tij.
“Kam pasur disa ndeshje të vështira por çuditërisht i kam fituar lehtë shumë prej tyre, nuk e prisja por deri tani ka qenë përvojë shumë e mirë për mua” – tha ai.
Përveç nivelit të lartë të garës, turneu u veçua për organizimin shembullor, mbështetjen institucionale dhe angazhimin e stafit, sponsorëve dhe vullnetarëve.
Sipas Jeton Oruçit, kryetar i Federatës së Pingpongut të Kosovës, suksesi kryesor ishte pjesëmarrja e shteteve mosnjohëse për Kosovën.
“Kanë qenë 9 ditë plot emocione, plot gara kemi fillu me grupmosha të reja, e patë edhe ju ishit dëshmitarë të ndeshjeve të nivelit shumë të lartë botëror, është hera e dytë që ne organizojmë ngjarje të tilla”.
“Shtetet që nuk e kanë njoft pavarësinë e Kosovës, përshtypjet e tyre kanë qenë tepër pozitive, sidomos mikpritja jonë, ushqimi, dhe çdo gjë tjetër që i ka përcjellur këto dy evente” – tha kryetari.
Spektatorët patën mundësinë të përjetojnë duele dramatike në të gjitha kategoritë – nga ndeshjet individuale, tek çiftet e përziera e deri te përballjet e fuqishme të çifteve meshkuj e femra.
“Këto 5 ditë kanë shku shumë shpejt, kemi pas ndeshje jashtëzakonisht të mira të forta, kemi pritur që sportistët tanë do kalojnë një fazë më tutje, por e kanë dhënë më të mirën e tyre. Sa i përket sportistëve tjerë favoritët kane ecur tutje ashtu siç është prit” – u shpreh Fadil Luta, Sekretar i Federatës së Pingpongut të Kosovës.
Sipas profesionistëve, koordinimi dhe drejtësia në gjykim ishin në standarde shumë të mira ndërkombëtare.
“Deri tash të gjithë jemi të lumtur, lojtarët, trajnerët, referët, kanë bërë punë shumë të mirë, çdo gjë është shumë mirë dhe jemi të lumtur këtu në Prishtinë. Jam shumë i kënaqur për nivelin e referëve lokal, po përmirësohen çdo ditë e më shumë dhe po tregojnë se niveli këtu është shumë në rregull sa i përket referëve” theksoi Ben Attia, menaxher i zyrtarëve të ndeshjes.
Turneu kulmoi të dielën me duelet finale në disa kategori, ku më të mirët e pingpongut u përballën për trofetë e shumëpritur. Te meshkujt, fitues doli lojtari nga Japonia, Kazuhiro Yoshimura që fitoi ndaj Suedisë.
“Ky tournament është i mrekullueshëm, kam kaluar mirë çdo ditë, ky organizim më ka rritur më shumë aftësitë e mia në pingpong. Qyteti është shumë i mirë, ushqimi poashtu, ka shumë njerëz këtu, secili ka qenë shumë i mirë dhe më pëlqen shumë ky qytet dhe Kosova” – tha lojtari japonez.
Japonia shfaqi një dominim të dukshëm në çiftet e femrave, ku dyshja Sakura Yokoi dhe Hitomi Sato luajtën me një bashkëpunim të shkëlqyer dhe teknikë të lartë, me një lojë të qetë dhe të kontrolluar, duke siguruar fitoren dhe duke vërtetuar edhe një herë nivelin e tyre të lartë në këtë disiplinë./Katror.info
