Këtë vjeshtë, shumë njerëz po vendosin të bëjnë një “rifillim” të jetës së tyre, shumë përpara se të vijë Janari dhe sezoni klasik i objektivave të rinj. Trendi i quajtur “The Great Lock-In”, që po përhapet me shpejtësi në rrjetet sociale, inkurajon njerëzit të përfitojnë nga ritmi më i qetë i vjeshtës për të ndërtuar zakone të shëndetshme, për të forcuar rutinat dhe për t’u përgatitur më mirë për sezonin festiv që po afron.
Sipas Laurie Singer, psikoterapiste dhe analiste sjelljeje në Kaliforni, gjithçka fillon me një pyetje të thjeshtë: “Çfarë dua vërtet të arrij?”
Ajo sugjeron fillimin me qëllime të vogla, të arritshme dhe reale – si për shembull një shëtitje 15-minutëshe në mëngjes, një mëngjes i shëndetshëm ose shënimi i një momenti pozitiv gjatë ditës. Sipas saj, “vetë akti i kontrollimit të një detyre të përfunduar në listë na jep ndjenjën e suksesit dhe na shtyn të ecim më tej.”
Mundesh me e lexu edhe...
Dietologia Lauren Harris-Pincus thekson se ndryshimet nuk duhet të jenë të mëdha për të pasur ndikim. Vetëm 10% e amerikanëve konsumojnë sasinë e rekomanduar ditore të frutave dhe perimeve, kështu që shtimi i një porcioni të tillë në çdo vakt është një hap i vogël me përfitime të mëdha.
Ajo gjithashtu këshillon të shmangim ndjenjën e fajit kur nuk arrijmë gjithçka që kemi planifikuar.
“Jeta ndodh. Sëmuremi, shkojmë me pushime, ose ngecim në punë. E rëndësishme është të rikthehemi te rutina sa më shpejt që të mundemi”.
Fillimi i 2-3 seancave 30-minutëshe në javë, duke zgjedhur aktivitete të thjeshta e relaksuese si ecja ose ushtrimet e shtrirjes, ndikon pozitivisht. Gradualisht, mund të shtojmë sfida, të përfshijmë një mik si motivim ose të shpërblejmë veten për përparimin.
Gjumi i rregullt dhe cilësor është ndër mënyrat më të fuqishme për të përmirësuar gjendjen fizike dhe mendore. Ndërkohë, pushimet e vogla mendore gjatë ditës – qoftë 3 minuta për të marrë frymë thellë apo për të shkruar një mendim pozitiv janë të domosdoshme për mirëqenie.
Qëllimi i këtij “lock-in” nuk është një transformim i menjëhershëm, por krijimi i zakoneve që bëhen pjesë e natyrshme e jetës./AP/Katror.info
