Në një kohë kur mediat e lira po përballen me sfida të mëdha nëpër botë, grupi legjendar amerikan R.E.M. ka vendosur të rimiksojë këngën e tyre ikonike të vitit 1983, “Radio Free Europe”, dhe të dhurojë të gjitha të ardhurat për organizatën mediale që i dha emrin këngës së tyre, shkruan CBS, përcjell Katror.info.
Kjo iniciativë vjen si reagim ndaj një vendimi të papritur të administratës Trump në muajin mars, për të ngrirë rreth 75 milionë dollarë fonde për Radio Free Europe/Radio Liberty (Radio Evropa e Lire) – një transmetues kyç për njerëzit që jetojnë nën regjime shtypëse, pa akses në media të pavarura.
“Është e rëndësishme për demokracinë dhe për luftën kundër autoritarizmit që kjo media të mbijetojë,” ka deklaruar grupi R.E.M., duke theksuar rolin e pazëvendësueshëm që Radio Free Europe ka luajtur dhe vazhdon të luajë në promovimin e lirisë së fjalës.
Mundesh me e lexu edhe...
RFE, e themeluar gjatë Luftës së Ftohtë, transmeton lajme dhe informacione të pavarura në vende ku shtypi është i kontrolluar apo i censuruar nga regjimet autoritare.
Rimiksimi i këngës simbolike të R.E.M. nuk është vetëm një akt solidariteti, por edhe një përpjekje për të ngritur vetëdijen dhe për të mbështetur një burim të rëndësishëm informacioni për miliona njerëz në mbarë botën./Katror.info
