Me 6 qershor, Lil Wayne publikoi pjesën e gjashtë të serisë së famshme Tha Carter, duke vulosur edhe njëherë një karrierë të jashtëzakonshme të ndërtuar mbi qëndrueshmëri, përshtatshmëri dhe dominim të vazhdueshëm, shkruan Billboard, transmeton Katror.info.
Rruga e tij në muzikë ngjan ndjeshëm me atë të legjendës së NBA-së, të ndjerit Kobe Bryant, një tjetër ikonë që nuk u mjaftua kurrë me talentin, por punoi pareshtur për madhështi.
Fillimet e vështira dhe ngritja drejt yllësisë
Ashtu si Wayne, edhe fillimet e Bryant nuk ishin të lehta. I zgjedhur nga Charlotte Hornets në draftin e NBA-së më 1996, Kobe vetëm 17 vjeç u shkëmbye menjëherë te Los Angeles Lakers për Vlade Divac.
Mundesh me e lexu edhe…
Edhe pse një fenomen në gjimnazin Lower Merion në Filadelfia, Kobe u detyrua të qëndronte në stol në sezonin e parë, duke luajtur pas Eddie Jones. Koha e tij në fushë ishte e kufizuar.
Ai shënonte vetëm gjashtë pikë për ndeshje. Në një ndeshje vendimtare ndaj Utah Jazz, ai dështoi katër herë radhazi. Trajneri Del Harris nuk i besonte ende të riut, por publiku e ndjente shkëndijën e një ylli në ardhje.
Karriera e Wayne nisi edhe më herët. Ai firmosi kontratë me Cash Money në moshën 11-vjeçare dhe publikoi albumin Tha Block Is Hot në moshën 17-vjeçare.
Me mbështetjen e Juvenile, B.G. dhe Turk, Wayne ishte një i ri i guximshëm, i gatshëm të sulmonte çdo ritëm me energji të egër.
Edhe pse i papërpunuar, karizma dhe energjia e tij qenë çelësi i hiteve si “Bling Bling” dhe “We on Fire.”
Ky i fundit shijoi suksesin me albumin 4x platin 400 Degreez dhe hitet “Ha” dhe “Back That Thang Up.” Si Bryant, që nisi pranë emrave të mëdhenj si Eddie Jones, Nick Van Exel dhe Shaquille O’Neal, edhe Wayne priti me durim momentin e tij. Dhe kur ai moment erdhi, asnjëri nuk u zmbraps përballë dritave të mëdha.
Ambicia për t’i kaluar idhujt e tyre
As për njërin dhe as për tjetrin nuk kishte rëndësi fama apo reklamat. Fitorja nuk erdhi brenda natës. Ata u zhytën në baltë, u përballën me rivalë, dhe u përpoqën të tejkalonin idhujt e vet. Kobe kishte Jordanin. Wayne kishte Jay-Z-në. Por admirim nuk do të thoshte dorëzim përkundrazi, Bryant dhe Wayne e kthyen respektin në motivim të çmendur.
“Mamba Mentality” e Kobe-s u ndërtua mbi obsesionin për përsosmëri. Pas mijëra orëve në dhomën e analizave, niveli i kontrollit të tij në fushë pasqyronte intensitetin e Wayne në studio.
Kur Bryant jepte leksione për të qenë i vendosur në momente vendimtare, Wayne tregonte si të jesh i pakonkurrueshëm, duke publikuar mijëra këngë me zgjuarsi dhe stil. Bryant dikur ishte parë thjesht si një “dunker” efektshëm, pa gjuajtje të qëndrueshme por përmes punës, ai u bë një lojtar vendimtar, pesë herë kampion, dhe zemra shpirtërore e një dinastie.
Wayne, nga ana tjetër, u transformua nga anëtar i Hot Boys në mbret i mixtape-ve dhe më pas ikonë e repit – të gjitha pa përdorur asnjëherë lapsin. Të dy e përçmuan përshkrimin që u bëhej në fillimet e tyre dhe i rishkruan vetë legjendat e tyre.
Dominimi në dekadën e artë
Nga seria e ndeshjeve me mbi 40 pikë në shkurt 2003, te ndeshja e famshme me 81 pikë në janar 2006, e deri te 7 gjuajtjet fituese në sezonin 2009-2010, Kobe ishte standardi i artë i NBA-së në dekadën e parë të shekullit XXI. Në të njëjtën kohë, seria Tha Carter e Wayne dhe mixtape-t si Da Drought dhe Dedication e vendosën atë në kategorinë “Reperi më i mirë në botë”.
Kobe ndoqi madhështinë në NBA. Wayne kërkoi pavdekësinë në artin e rimës. Fusha të ndryshme por i njëjti mentalitet. /Katror.info
Përgatiti:
