ChatGPT po bëhet gjithnjë e më shumë një “asistent personal” ose motor kërkimi i përditshëm.
Prandaj, është e dobishme të dini si të përfitoni sa më shumë nga ky ‘chatbot’ me inteligjencë artificiale. Ndryshe nga motorët tradicionalë të kërkimit në internet, ChatGPT funksionon më mirë kur i jepet një kuadër fillestar i qartë, kontekst, shembuj, stili i dëshiruar dhe të paktën një kuptim bazë i mënyrës së të menduarit të përdoruesit, përcjell Telegrafi.
Një pyetje e thjeshtë shpesh nuk mjafton.
Mundesh me e lexu edhe...
Nëse dëshironi të merrni përgjigjet më të sakta dhe më të dobishme, provoni këto pesë këshilla profesionale.
1. Roli (role prompting)
ChatGPT reagon shumë mirë kur i caktoni një rol. Mund të duket e çuditshme në fillim, por është një mënyrë shumë efektive për të përcaktuar tonin dhe thellësinë e përgjigjes.
Për shembull, nëse shkruani “Ma shpjego këtë sikur të kem 12 vjeç”, do të merrni një shpjegim të thjeshtë, transmeton faqja BGR.
Megjithatë, nëse kërkoni “Sillu sikur je profesor me mbi 30 vjet përvojë në sociologji”, rezultati do të jetë shumë më i avancuar dhe analitik.
2. Jepni shembuj
Pavarësisht nëse i kërkoni ChatGPT-së të shkruajë një tekst, të përmbledhë një përmbajtje apo t’i përgjigjet një emaili, dhënia e shembujve është një nga teknikat më efektive.
Nëse dëshironi që AI të shkruajë një email në emrin tuaj, është e dobishme të shtoni një shembull se si shkruani zakonisht, ose të thoni “Dua të krijosh diçka të ngjashme”. Sa më shumë shembuj të jepni, aq më i saktë dhe më afër pritshmërive do të jetë rezultati.
3. Përfshini kontekstin
Një këshillë tjetër thelbësore: gjithmonë shtoni kontekst. Pse po e bëni pyetjen? Çfarë dini tashmë për temën? Çfarë prisni nga përgjigjja?
A po bëni kërkim, po shkruani një ese apo thjesht jeni kureshtar? Sa më shumë informacione t’i jepni ChatGPT-së, aq më mirë mund ta përshtatë përgjigjen me nevojat tuaja.
4. Përcaktoni tonin dhe personalitetin e përgjigjes
Është e dobishme të tregoni se çfarë toni dëshironi që përgjigjja të ketë. Nëse po mësoni një gjuhë të re, mund të jetë e përshtatshme që stili të jetë i gëzueshëm dhe edukativ, me shumë shembuj.
Nëse ju duhet një përgjigje e drejtpërdrejtë dhe konkrete, mund të kërkoni që të jetë e shkurtër dhe e bazuar në fakte. Nëse po shkruani një artikull, përdorni mbiemra që e orientojnë tonin, si: humoristik, ironik, dramatik ose frymëzues.
5. Kërkoni shpjegim hap pas hapi
Në fund, nëse pyetja kërkon një përgjigje të ndërlikuar ose me disa pjesë, rekomandohet që ChatGPT ta shpjegojë procesin hap pas hapi.
Për shembull, në detyra matematikore ose probleme logjike, mund të kërkoni që të tregojë çdo hap që çon në zgjidhje.
Në këtë mënyrë do ta kuptoni më lehtë rrjedhën e arsyetimit dhe mund të dalloni gabimet eventuale në logjikë./Katror.info
