Komisioni Qendror i Zgjedhjeve (KQZ) ka certifikuar listën e votuesve për zgjedhjet lokale të 12 tetorit, ku qytetarët do të zgjedhin Kryetarët e 38 komunave dhe përbërjet e Kuvendeve Komunale. Sipas të dhënave zyrtare, 2,069,098 qytetarë kanë të drejtë vote, prej të cilëve 43,993 janë votues nga jashtë vendit.
Në këto zgjedhje garojnë 5,626 kandidatë: 206 për kryetarë komunash, ndërsa të tjerët për ulëse në kuvendet komunale. Votimi me postë për diasporën është i hapur që nga 17 shtatori.
Ku dhe si votohet
Procesi i votimit do të zhvillohet në 938 qendra votimi me gjithsej 2,625 vendvotime në mbarë vendin.
Mundesh me e lexu edhe...
Qytetarët ftohen që paraprakisht të verifikojnë qendrën e tyre të votimit në faqen zyrtare qv.kqz-ks.org
dhe të sigurohen se me vete kanë një dokument identifikimi të vlefshëm ditën e zgjedhjeve.
Pasi të arrini në qendrën tuaj të votimit, gjeni vendvotimin përkatës brenda saj dhe merrni dy fletëvotimet e vulosura – një për kryetarin/en e komunës dhe tjetrën për kuvendin komunal.
Si plotësohen fletëvotimet
Kryetar Komune — fletëvotimi me kornizë të verdhë
Fletëvotimi për kryetar komune përmban emrat e kandidatëve dhe subjektet politike që i përfaqësojnë.
- Votuesi zgjedh vetëm një kandidat dhe vendos shenjë (✔️/X) në katrorin pranë emrit.
- Vendosja e më shumë se një shenje e bën votën të pavlefshme.
Kuvend Komunal — fletëvotimi me kornizë të kaltër
Në anën e majtë listohen subjektet politike; në anën e djathtë kandidatët e atij subjekti.
- Hapi 1: Votohet vetëm një subjekt politik (majtas).
- Hapi 2 (opsionale): Votohet vetëm një kandidat nga lista e atij subjekti (djathtas).
- Nëse shënohen më shumë se një kandidat, llogaritet vetëm vota për subjektin politik.
Sqarimet e KQZ-së
Zëdhënësi i KQZ-së, Elezi, ka theksuar se votuesit nuk kanë nevojë të votojnë veçmas bartësin e listës:
“Vota për subjektin politik llogaritet votë edhe për bartësin e listës, emri i të cilit në fletëvotim shkruhet nga KQZ nën emrin e subjektit politik.”
A lejohet vota e ndarë mes dy garave?
Po. KQZ sqaron se zgjedhjet për Kryetar Komune dhe për Kuvend Komunal janë procese të ndara me fletëvotime të veçanta. Kështu, një votues mund të votojë një kandidat për kryetar nga një subjekt dhe një subjekt tjetër/kandidat për kuvendin komunal.
Për votuesit jashtë vendit
Votuesit e regjistruar jashtë Kosovës mund të votojnë me postë prej 17 shtatorit sipas udhëzimeve të KQZ-së. Vota konsiderohet e vlefshme nëse respektohen afatet dhe rregullat e paketimit/dërgimit të përcaktuara nga Komisioni./Katror.info
