Rrjetet sociale po pushtohen nga videot e krijuara nga inteligjenca artificiale – dhe ekziston një shenjë e thjeshtë që mund të të ndihmojë t’i dallosh: a duket sikur është filmuar me patate?
Ekspertët paralajmërojnë se teknologjia e AI video po përparon aq shpejt sa shumë shpejt do të jetë e pamundur të besosh çdo gjë që sheh në ekran. Por për momentin, ekzistojnë disa sinjale paralajmëruese, dhe më i dukshmi është cilësia e dobët e videos, shkruan BBC, transmeton Katror.info.
“Është gjëja e parë që shikojmë,” shpjegon Hany Farid, profesor i shkencave kompjuterike në Universitetin e Kalifornisë, Berkeley, dhe themelues i kompanisë për zbulimin e deepfake-ve, GetReal Security.
Mundesh me e lexu edhe…
Sipas tij, videot që duken të turbullta, me rezolucion të ulët apo të kompresuara, shpesh janë pikërisht ato që mund të jenë krijuar nga AI. Arsyeja është e thjeshtë: cilësia e ulët fsheh gabimet, duke maskuar detaje që zakonisht tradhtojnë përmbajtjen e rreme – si lëkura tepër e lëmuar, flokët që lëvizin në mënyrë të çuditshme, apo sfondet që ndryshojnë pa arsye.
Në muajt e fundit, disa video të tilla mashtruan miliona njerëz: lepuj që kërcejnë në trampolinë, një çift që bie në dashuri në metronë e Nju Jorkut, madje edhe një prift që mban një “predikim socialist”. Të gjitha kishin diçka të përbashkët – dukeshin sikur ishin xhiruar me një kamerë të vjetër e me cilësi të dobët.
Farid thotë se mashtruesit e dinë këtë: “Pasi krijojnë videon e rreme, ata ulin qëllimisht rezolucionin dhe shtojnë kompresim për ta bërë më të besueshme.”
Një tjetër tregues është gjatësia e videos. Shumica e videove të krijuara nga AI janë shumë të shkurtra – zakonisht 6 deri në 10 sekonda – sepse gjenerimi i materialeve më të gjata është i kushtueshëm dhe rrit mundësinë e gabimeve.
Megjithatë, ekspertët paralajmërojnë se këto truke nuk do të zgjasin shumë. Brenda pak vitesh, edhe këto “shenja” vizuale do të zhduken. “Thjesht nuk mund t’u besosh syve të tu,” thotë Matthew Stamm, profesor në Universitetin Drexel.
Zgjidhja, sipas studiuesve, qëndron te verifikimi i burimit të videos, jo te pamja e saj. Platforma të ndryshme po punojnë për standarde që do të shënojnë automatikisht nëse një përmbajtje është autentike apo e gjeneruar nga AI.
Eksperti i edukimit digjital Mike Caulfield e përmbledh më qartë:
“Në të ardhmen, videoja do të trajtohet si teksti – e rëndësishme do të jetë origjina, jo pamja. Duhet të mësojmë ta shohim internetin me atë sy.” /Katror.info
Burimi: BBC
Përktheu dhe përshtati: Katror.info
