Kryeministri në detyrë i Kosovës, Albin Kurti, është pritur në takim nga Sekretarja e Shtetit për Punë të Jashtme të Mbretërisë së Bashkuar, Yvette Cooper, pak para nisjes së punimeve të Samitit të Procesit të Berlinit që po mbahet në Londër.
Të dyja palët diskutuan për sigurinë, zhvillimin ekonomik dhe migracionin, si dhe për thellimin e bashkëpunimit dypalësh në energji, infrastrukturë dhe arsim.
Në takim, Kurti shprehu mirënjohjen për rolin e Britanisë së Madhe në çlirimin dhe shtetndërtimin e Kosovës, duke e cilësuar këtë partneritet si kyç për përballjen me kërcënimet e sigurisë në rajon, përfshirë ndikimin rus dhe dezinformimin.
Mundesh me e lexu edhe...
Kurti theksoi investimet në fushën e mbrojtjes dhe ambicien e vendit për anëtarësim në NATO dhe Bashkimin Evropian, duke nënvizuar se Kosova “është vendi më demokratik dhe me rritjen më të shpejtë ekonomike në rajon”.
Ai gjithashtu rikujtoi se organizatorët e sulmit të Banjskës vazhdojnë të mbrohen nga Serbia, gjë që sipas tij paraqet rrezik të vazhdueshëm për sigurinë.
Kurti foli edhe për rëndësinë e mbrojtjes së të drejtave të njeriut në rajon, duke vënë në pah se Kosova ofron standardet më të avancuara për komunitetet pakicë, si dhe u zotua për bashkëpunim me Britaninë në menaxhimin e migracionit dhe forcimin e sigurisë kufitare.
Në fund, u diskutua edhe rreth migracionit.
“Në lidhje me migracionin, Kryeministri tha që Kosova nuk është burim i migrimit, por që ka vullnet të ndihmojë një shtet mik dhe partner si Britania e Madhe, të menaxhojë rrjedhën e migracionit. Së bashku po punojmë në forcimin e sigurisë kufitare, si dhe luftimin e krimit të organizuar”./Albanian Post/Katror.info
