Në orën 18:00, në ambientet e Bibliotekës Kombëtare të Kosovës, sot do të promovohet libri “Libri im i kujtimeve” nga kompozitori dhe dirigjenti i njohur Rafet Rudi.
I ftuar në programin e mëngjesit në RTK, autori tregoi se botimi i tij përfshin një periudhë prej tri dekadash, që nga fillimet e tij në muzikë. “Ky libër përfshin një periudhë të kufizuar prej hyrjës sime në botën e muzikës 69 – 99”, tha ai, duke theksuar se këto janë vitet më të rëndësishme për formësimin e jetës muzikore në Kosovë, shkruan RTK.
Sipas tij, edhe pse formalisht mund të konsiderohet një autobiografi, libri në fakt është më shumë një rrëfim dokumentues i zhvillimeve në muzikën e kultivuar në Prishtinë dhe Kosovë.
Mundesh me e lexu edhe…
“Ky është të themi nominalisht një libër biografik, autobiografik, por siç është shpjeguar në ato parathënjet të librit, kjo është një kronik muzikore ose të them kronikë muzikore e jetës muzikore në Prishtinë, në Kosovë në një periudhë 30 vjeçare”, theksoi ai.
Rudi bëri të ditur se fokusi nuk është te jeta e tij personale, por te proceset institucionale dhe kulturore që kanë ndodhur gjatë atyre viteve.
“Ndonëse libri ka primesa të autobiografisë, por nuk është autobiografi klasike. Unë nuk flasë shumë për veten, por kapitujt e librit përfshijnë institucionet kryesore të jetës muzikore që janë formuar pikërisht në këtë kohë”, u shpreh kompozitori.
Ai shtoi se libri përshkruan një periudhë të rëndësishme të zhvillimit artistik dhe përmban edhe përjetime të thella personale.
“Unë e lokalizoj këtë interesimin tim deri në vitin 2000 dhe jeta muzikore e parë me sytë e mi aty ka impresione, ka dromca krejtësisht intime, ashtu si i kam parë dhe përjetuar unë në jetën tonë profesionale. Kjo është shumë e rëndësishme, koencidon pikërisht kjo hyrje në botën e muzikës këtu me ardhjen e një gjenerate të re të profesionistëve muzikorë të muzikës klasike, që mund të them se deri në atë kohë s’ka qenë në baza tepër profesionale”, tha Rudi.
Në panelin e diskutimit që do të mbahet gjatë promovimit, do të marrin pjesë: autori Rafet Rudi, filozofi dhe kritiku Shkëlzen Maliqi, kompozitori dhe studiuesi Nestor Kraja, si dhe ushtruesi i detyrës së drejtorit të Filharmonisë së Kosovës, Dardan Selimaj. Moderatore e panelit do të jetë muzikologia Rreze Kryeziu Breznica./Katror.info
