Këtë të shtunë, kryeqyteti shqiptar do të shndërrohet në një pistë të vërtetë çiklizmi ndërkombëtar, teksa etapa e dytë e “Giro d’Italia”, një nga garat më të njohura në botë, do të zhvillohet për herë të parë brenda kufijve të qytetit të Tiranës.
Eventi pritet të mbledhë vëmendjen e sportdashësve vendas dhe ndërkombëtarë, duke e vendosur Shqipërinë në hartën e ngjarjeve të mëdha sportive globale. Për këtë arsye, Policia e Tiranës ka njoftuar masa të veçanta të kufizimit të trafikut dhe parkimit në disa nga rrugët dhe zonat më të frekuentuara të qytetit, gjatë orarit 10:00 deri në 18:00.
Akset ku do të ndalohet qarkullimi përfshijnë Sheshin “Skënderbej”, Rrugën “Urani Pano”, Bulevardin “Gjergj Fishta”, Bulevardin “Bajram Curri”, si dhe disa zona pranë “Papa Gjon Pali II” dhe “Ukraina e Lirë”.
Mundesh me e lexu edhe…
Policia bën thirrje për bashkëpunim dhe mirëkuptim nga qytetarët dhe drejtuesit e mjeteve, duke theksuar se këto masa janë të domosdoshme për sigurinë e pjesëmarrësve dhe mbarëvajtjen e garës. Në këtë kuadër, janë marrë masa shtesë organizative, përfshirë dhe një instruktazh të posaçëm të punonjësve të policisë mëngjesin e sotëm.
Tirana, për një ditë, do të jetë në qendër të vëmendjes së çiklizmit botëror — një mundësi për të promovuar sportin, qytetin dhe mikpritjen shqiptare./Katror.info
