Mbështetje për angazhimin e të rinjve në efiçience të energjisë, zhvillimin e shkathtësive dhe gjenerimin e të dhënave në Kosovë.
Prishtinë, 24 tetor 2025 – Banka Evropiane për Rindërtim dhe Zhvillim (BERZH) dhe UNICEF-i në Kosovë po bashkojnë forcat për të mbështetur angazhimin e të rinjve në efiçiencen energjetike, zhvillimin e shkathtësive dhe hartimin e politikave të bazuara në të dhëna, me qëllim që të arrihen rezultate konkrete për fëmijët dhe të rinjtë.
“Duke u mbështetur në partneritetin global mes UNICEF-it dhe BERZH-it, Memorandumi i Mirëkuptimit (MoU) i nënshkruar sot në Prishtinë shënon fillimin e një përpjekjeje të koordinuar në Kosovë për të vendosur një kornizë bashkëpunimi që synon angazhimin e të rinjve si agjentë aktivë të ndryshimit në tranzicionin e gjelbër; ngritjen e shkathtësive të të rinjve, sipërmarrjes dhe kalimin drejt vendeve të punës të gjelbra; si dhe shfrytëzimin e ekspertizës së të dyja palëve për të përmirësuar gjenerimin e të dhënave cilësore dhe analizave, duke nxitur rezultate me ndikim që fuqizojnë investimet në kapitalin njerëzor. Ky bashkëpunim synon të krijojë një model që bashkon qeverinë, sektorin privat, shoqërinë civile dhe të rinjtë në një kornizë të përbashkët për zhvillim të qëndrueshëm”, thuhet në komunikatën për media.
Mundesh me e lexu edhe...
Më tej thuhet se “Kosova gjendet në një moment unik, me një popullatë të re në rritje, një strategji që avancon objektivat për klimën dhe eficiencen energjetike, dhe me një rritje të fuqizimit të të rinjve në tregun e punës dhe jetën qytetare. Përmes këtij partneriteti, Kosova bëhet pioniere në Ballkanin Perëndimor, duke treguar se si iniciativat e fokusuara tek të rinjtë dhe të bazuara në prova, të harmonizuara me kornizat e investimeve të gjelbra, mund të përshpejtojnë përparimin”.
Ky Memorandum bashkon mandatin e UNICEF-it për të promovuar të drejtat dhe mirëqenien e fëmijëve dhe të rinjve me ekspertizën dhe instrumentet financiare të BERZH-it në ekonominë e gjelbër, efiçiencen e energjisë dhe investimet e qëndrueshme.
Në kuadër të këtij Memorandumi, UNICEF-i në Kosovë dhe BERZH-i do të bashkëpunojnë në tre fusha kryesore, dhe jo vetëm:
Angazhimi i të rinjve për tranzicionin e gjelbër: përfshirja e të rinjve në zbatimin e masave për efiçience energjetike dhe qëndrueshmëri mjedisore të mbështetura nga BERZH-i, përfshirë edhe përmes huasë së dhënë institucioneve të Kosovës që do të zbatohet nga Fondi i Kosovёs pёr Efiçiencё tё Energjisё (FKEE). Aktivitetet e UNICEF-it dhe të nismës Green Rising, në përputhje me programin e tij në Kosovë, do të përfshijnë fushata ndërgjegjësuese mbi efiçiencen e energjisë të udhëhequra nga të rinjtë dhe nisma avokuese për të promovuar investimet në masa për efiçience të energjisë.
Zhvillimi i shkathtësive dhe sipërmarrjes: forcimi i gatishmërisë profesionale dhe shkathtësive sipërmarrëse të të rinjve për karrier të gjelbër. Kjo do të përfshijë harmonizimin dhe bashkëpunimin me nisma ekzistuese për të rinjtë, si UPSHIFT, PONDER, PODIUM, Kosovo Generation Unlimited dhe programe të BERZH-it.
Gjenerimi i të dhënave: bashkëpunimi në mbledhjen dhe analizimin e të dhënave për të mbështetur vendimet e investimeve dhe dialogun politik, përfshirë përmes shkëmbimit të të dhënave për anketa si Anketa e Treguesve të Shumëfishtë (MICS), dhe përdorimin e të dhënave për të informuar programimin dhe avokimin.
BERZH-i dhe UNICEF-i në Kosovë do të monitorojnë progresin e përbashkët, do të angazhojnë partnerë dhe do të ndajnë rezultatet me synimin për të zgjeruar zbatimin e modeleve të suksesshme në mbarë rajonin e Ballkanit Perëndimor./EO/Katror.info
