Universiteti i Prishtinës ka organizuar një ceremoni solemne për të nderuar njërin prej juristëve më të shquar në botë në fushën e së drejtës ndërkombëtare, z. Hisashi Owada, me titullin “Doctor Honoris Causa”, shkruan Katror.info.
Z. Owada u vlerësua për kontributin e tij të jashtëzakonshëm akademik dhe angazhimin jetësor në drejtësi ndërkombëtare, si dhe në promovimin e paqes globale. Gjatë karrierës së tij të pasur, ai ka shërbyer si profesor në universitetet prestigjioze si Tokio, Waseda, Harvard, Columbia dhe New York, duke formuar breza të tërë juristësh dhe diplomatësh.
Në ceremoni morën pjesë përfaqësues të jetës publike dhe akademike nga vende të ndryshme, ndër ta edhe ambasadori i Japonisë në Austri dhe Kosovë, shkëlqesia e tij z. Kiminori Iwama.
Hisashi Owada njihet gjithashtu për lidhjet e tij të ngushta me familjen perandorake japoneze, pasi është babai i perandoreshës Masako, bashkëshortes së perandorit Naruhito të Japonisë.
Ky nderim shënon një moment të rëndësishëm për Universitetin e Prishtinës dhe thekson angazhimin e tij për të njohur dhe promovuar vlerat akademike dhe juridike në nivel global./Katror.info
