Në vitin 2024, mbi 4.9 milion vizitorë udhëtuan drejt Parkut Kombëtar të Grand Canyon, duke e bërë atë një nga parqet më të vizituara kombëtare në SHBA. Por ka një detaj interesant: vetëm rreth një përqind e vizitorëve zbresin poshtë buzës së kanionit.
Njerëzit udhëtojnë nga çdo cep për të qëndruar mbi buzë dhe për të shijuar pamjen e kanionit, por pak nga ta guxojnë të zbresin brenda tij. Grand Canyon Conservancy Field Institute, një operator turistik i specializuar në udhëtime dhe aventurë brenda Grand Canyon, synon ta ndryshojë këtë.
“Nuk do ta harroj kurrë udhëtimin tim të parë në Grand Canyon në vitin 2007. Në moshën nëntë vjeçare, po kampoja me familjen në Mather Point, dhe pamja e kanionit më la pa fjalë. Pastaj babai më tha se do të zbrisnim brenda tij, dhe u tmerrova”.
Mundesh me e lexu edhe...
“Por teksa zbresim në Bright Angel Trail, frika ime filloi të zhdukej. Sa më thellë shkonim, aq më shumë mbështillej admirim për ngjyrat e kanionit dhe bukurinë e peizazhit.Aventurat më të mira shpesh fillojnë me frikë ose pasiguri, por përfundojnë duke na inspiruar dhe ndryshuar”, thotë Noelle Ritzman, specialiste e tureve ditore dhe logjistikës në Grand Canyon Conservancy Field Institute.
Këto shëtitje brenda Grand Canyon zakonisht kryhen dimrit dhe pranverës, që janë disa nga periudhat më të mira për vizitë për shkak të temperaturave më të ftohta dhe turmave të pakta. Udhëtimet e drejtuara nga instituti nën buzë të kanionit variojnë nga turet për fillestarë “Meet the Canyon” që zgjasin gjashtë orë, deri tek udhëtimet 10-ditore “Hermit to South Bass Backpacking”.
Pamjet dhe historia që presin udhëtarët që guxojnë të zbresin poshtë buzës së kanionit plotësohen nga udhëheqja dhe njohuritë e guidave, shumica e të cilëve, sipas Ritzman, “kanë jetuar, punuar dhe studiuar në Grand Canyon”. /AP/Katror.info
