Një aplikacion i ri, i mbështetur nga ambientalistë dhe organizata të mbrojtjes së natyrës, synon të rikthejë njerëzit më afër mjedisit natyror duke hartuar hapësirat e egra të Mbretërisë së Bashkuar – nga parqet urbane deri te brigjet më të largëta.
Shkenca ka vërtetuar se koha e kaluar në natyrë ndihmon trupin dhe mendjen: ul stresin dhe ankthin, ndikon në uljen e tensionit të gjakut dhe mund të reduktojë rrezikun e sëmundjeve të zemrës. Megjithatë, në jetën moderne të zënë, natyra shpesh mbetet në plan të dytë.
Kjo është arsyeja pse sipërmarrësi Ant Rawlins krijoi aplikacionin Wildling, një platformë falas për celular që ndihmon njerëzit të zbulojnë hapësirat e gjelbra pranë tyre ose gjatë udhëtimeve. Aplikacioni bashkon në një hartë digjitale të gjitha zonat e egra dhe të fshehta të Britanisë, duke e bërë më të lehtë qasjen në natyrë dhe duke inkurajuar njerëzit të ndihen pjesë e mjedisit të tyre lokal, shkruan Positive News, përcjell Katror.info.
Mundesh me e lexu edhe…
Wildling mbështetet nga organizata të njohura si Shoqata Mbretërore për Mbrojtjen e Zogjve (RSPB), Marine Conservation Society dhe Forestry England, si dhe nga figura të njohura mjedisore përfshirë investitoren e “Dragon’s Den” Deborah Meaden, financierin Ben Goldsmith dhe themeluesin e “Eden Project”, Tim Smit.
“Në kohën e sotme, kur të gjithë jemi të ngjitur pas ekraneve, dalja në natyrë është jetike,” thotë Deborah Meaden. “Wildling e bën këtë më të lehtë – është në pajisjen tënde, si një kujtesë që të çon drejt natyrës, qoftë gjatë pushimit të drekës apo pas darke. Madje të ndihmon të gjesh vende të bukura për fëmijët gjatë udhëtimeve të gjata.”
Aplikacioni përfshin mbi 1,500 destinacione në të gjithë Mbretërinë e Bashkuar – nga pyje dhe bregdetet, te rezervatet natyrore dhe hapësirat urbane. Një seksion me përmbajtje interaktive ofron këshilla praktike për eksplorimin, si “si të ndërtosh një strehë në pyll” apo “si të kërkosh krijesa në pishina shkëmbore”.
Meaden shton se lidhja me natyrën është pjesë e përditshme e jetës së saj:
“Çdo mëngjes dal zbathur në kopsht për t’u lidhur me tokën – më ndihmon të qetësohem para ditës. Wildling më lehtëson edhe kur jam larg shtëpisë, për të gjetur hapësira të qeta ku mund të rikthehem tek natyra.”
Përveç eksplorimit, aplikacioni ofron edhe një opsion për donacione vullnetare, që u lejon përdoruesve të mbështesin partnerët bamirës të Wildling apo të marrin pjesë në aktivitete lokale vullnetare. Qëllimi, sipas themeluesit, nuk është vetëm të ndihmojë njerëzit të shijojnë natyrën, por edhe t’i frymëzojë ta mbrojnë atë./Katror.info
