Zhurma e bardhë është një kombinim i frekuencave të ndryshme që krijojnë një tingull të qëndrueshëm, si zhurma e një televizori pa sinjal apo rrotullimi i një ventilatori. Kjo zhurmë mund të kujtojë tingujt që një foshnjë dëgjon në mitër, ndaj vepron si qetësuese natyrale.
Sipas konsulentes së gjumit Andrea Grace, zhurma e bardhë ndihmon sepse krijon asociacion gjumi – një sinjal i qëndrueshëm që i tregon fëmijës se është koha për të fjetur. Ajo gjithashtu maskon zhurmat e papritura që mund ta zgjojnë fëmijën gjatë natës, shkruan BBC, raporton Katror.info.
- A ndihmon zhurma e bardhë kur foshnja zgjohet natën?
Po, nëse është pjesë e rutinës së gjumit. Kur foshnjat kalojnë nga gjumi i thellë në atë të lehtë, një zhurmë qetësuese si kjo mund t’u tregojë se ende është natë dhe nuk është koha për t’u zgjuar plotësisht.
Mundesh me e lexu edhe…
Por, BBC thekson se zhurma e bardhë nuk është zgjidhje për të gjitha problemet e gjumit – ajo ndihmon, por nuk i zëvendëson faktorët e tjerë të rëndësishëm si rutina, rehatia dhe shëndeti i fëmijës.
- Kur dhe si ta përdorni zhurmën e bardhë?
▪️ Filloni ta përdorni në momentin që foshnja vendoset në shtrat.
▪️ Mund ta përfshini si pjesë e rutinës së natës, bashkë me libra apo këngë.
▪️ Lëreni të aktivizuar gjatë gjithë natës për të ruajtur ndjesinë e vazhdimësisë.
- Sa e fortë duhet të jetë?
▪️Rreth 50 decibel është maksimumi i sigurt.
▪️Rregulli: nëse duhet të flisni me zë të lartë për të tejkaluar zhurmën, është shumë e lartë.
▪️ Përdorni aplikacione për të matur nivelin e zhurmës nga afërsia e krevatit të foshnjës.
- A duhet ta ndërprisni zhurmën e bardhë në një moshë të caktuar?
Jo domosdoshmërisht. Nëse është në volum të sigurt, mund të vazhdoni ta përdorni për aq kohë sa funksionon për gjumin e fëmijës. Disa prindër vendosin ta heqin kur kalojnë nga krevat për foshnje në atë për fëmijë, por nuk ka një rregull të prerë për këtë.
- Zhurma e bardhë, rozë dhe kafe – cila është më e mirë?
▪️ Të gjitha kanë frekuenca të ndryshme:
▪️ E bardha është më e lartë
▪️E rozë dhe e kafja (e njohur edhe si “brown noise”) janë më të ulëta dhe shpesh më qetësuese për prindërit.
▪️ Zgjedhja është çështje preference personale./Katror.info
