Komuna e Prishtinës ka përgatitur një program të pasur festiv për të shënuar 1 Qershorin – Ditën Ndërkombëtare të Fëmijëve, një datë që simbolizon rëndësinë e mbrojtjes dhe mirëqenies së fëmijëve anembanë botës. Në këtë ditë të veçantë, Sheshi “Zahir Pajaziti” do të shndërrohet në një hapësirë plot gjallëri, ngjyra dhe aktivitete argëtuese për fëmijët dhe familjet e tyre.
Festimet do të fillojnë me një fjalë rasti nga kryetari i Komunës së Prishtinës, Përparim Rama, i cili do të përshëndesë pjesëmarrësit, duke treguar përkushtimin institucional ndaj të drejtave dhe mirëqenies së fëmijëve.
Programi artistik përfshin performanca dhe shfaqje të përgatitura nga fëmijët e Qendrës Kulturore të Fëmijëve, Orkestra e Fëmijëve “Amadeus”, si dhe nga Shkolla e Mesme e Lartë Muzikale “Prek Jakova”. Aktivitetet kreative do të pasurohen me punëtori arti, lojëra interaktive, shfaqje filmash dhe balet, duke krijuar një atmosferë të ngrohtë dhe festive.
Mundesh me e lexu edhe…
Në aspektin sportiv, dita do të karakterizohet nga turne i futbollit të vogël, garat në karate, pingpong dhe basketboll 3×3, duke promovuar shëndetin fizik dhe frymën e ekipit mes fëmijëve.
Një nga momentet më të veçanta do të jetë parada “Ec me Fëmijët”, ku fëmijët do të marshojnë së bashku me punimet e tyre artistike, në një varg simbolik për kreativitetin, zërin dhe të drejtën për të qenë të parë e dëgjuar.
Gjithashtu, Drejtoresha për Kulturë në Prishtinë, Sibel Halimi, bëri thirrje që të gjithë fëmijët t’i bashkohen festës: “Dita Ndërkombëtare e Fëmijëve po vjen me plot ngjyra, e me një program të pasur artistik e aktivitete të ndryshme sportive. Ju ftojmë të na bashkoheni këtë të diel për një ditë të veçantë, plot argëtim, krijimtari dhe dashuri për fëmijët tanë”.
Por çfarë simbolizon 1 Qershori?
Dita Ndërkombëtare e Fëmijëve, e cila shënohet çdo vit më 1 qershor, u vendos për herë të parë në vitin 1925, gjatë Konferencës Botërore për Mirëqenien e Fëmijëve në Gjenevë. Që atëherë, shumë vende, përfshirë edhe Kosovën, e festojnë këtë ditë me aktivitete që synojnë ndërgjegjësimin për të drejtat e fëmijëve, ofrimin e dashurisë, sigurisë dhe një mjedisi të përshtatshëm për zhvillimin e tyre.
Misioni i kësaj dite është të theksojë rëndësinë e mbrojtjes së të drejtave të fëmijëve, promovimin e edukimit cilësor, mirëqenies fizike dhe psikologjike, si dhe përfshirjen e tyre aktive në shoqëri./Katror.info
