115-vjeçarja britanike shpallet personi më i vjetër në botë

Ethel Caterham nga Mbretëria e Bashkuar është shpallur personi më i moshuar në botë në moshën 115 vjeç e 252 ditë, pas vdekjes së murgeshës braziliane, Inah Canabarro Lucas, e cila ndërroi jetë në moshën 116-vjeçare, shkruan BBC, transmeton Katror.info.

Zonja Caterham jeton në një shtëpi kujdesi në Lightwater, Surrey, dhe ka lindur më 21 gusht 1909. Ajo është qytetarja e fundit e gjallë që ka qenë nënshtetase e mbretit Eduard VII.

Gjatë ditëlindjes së saj të 115-të, të festuar në gusht 2024, Ethel tha me humor se “nuk e di pse bëhet gjithë kjo zhurmë”. Si sekret të jetëgjatësisë, ajo përmendi: “Nuk grindem me askënd, dëgjoj dhe bëj atë që më pëlqen”.

Rekordi i saj është zyrtarizuar nga Guinness World Records dhe LongeviQuest, databaza që dokumenton njerëzit më të moshuar në botë.

‘Një arritje e jashtëzakonshme’

Në 115-vjetorin e lindjes, Ethel mori një letër urimi nga Mbreti i Mbretërisë së Bashkuar, i cili e cilësoi këtë si “një arritje të jashtëzakonshme” dhe i dërgoi “urimet më të ngrohta”, duke u shprehur i impresionuar nga jeta e saj.

Ethel lindi në Shipton Bellinger, Hampshire, dhe u rrit në Tidworth, Wiltshire. Ajo ishte fëmija i shtatë nga tetë. Në moshën 18-vjeçare punoi si dado për një familje ushtarake në Indi. U kthye në Mbretëri në vitin 1931 dhe u martua me Norman Caterham në Katedralen e Salisbury në vitin 1933. Ai shërbeu si kolonel në ushtri dhe ata jetuan në Hong Kong dhe Gjibraltar.

Gjatë qëndrimit në Hong Kong, Ethel hapi një çerdhe për fëmijë. Ajo ka qenë dëshmitare e shumë ngjarjeve historike, përfshirë fundosjen e Titanikut, dy luftërat botërore, Revolucionin Rus dhe Depresionin e Madh.

Prej më shumë se 50 vitesh ajo jeton në Surrey dhe ka vazhduar të ngasë makinën deri në moshën 97-vjeçare. Një nga motrat e saj, Gladys, jetoi deri në moshën 104-vjeçare. Ajo ka tri mbesa dhe pesë stërnipër.

Një përfaqësues i shtëpisë së kujdesit Hallmark Lakeview tha:
“Është një arritje e jashtëzakonshme dhe dëshmi e një jete të jetuar me dinjitet. Forca dhe mençuria e Ethelit janë frymëzim për të gjithë ne.”

Sipas Guinness World Records, Ethel është gjithashtu një nga njerëzit më të moshuar që ka mbijetuar nga Covid-19, pasi e kaloi sëmundjen në moshën 110-vjeçare në vitin 2020.

Mark McKinley, drejtor i rekordeve në Guinness, tha:
“Ethel nuk e kishte qëllim të thyente rekorde, por tani mezi presim ta takojmë dhe t’ia dorëzojmë çertifikatën.”/Katror.info