Sot, më 20 janar 2025, shënohen 16 vjet nga transformimi i Trupave Mbrojtëse të Kosovës (TMK) në Forcën e Sigurisë së Kosovës (FSK).
Ky rrugëtim ka qenë i mbushur me sfida dhe arritje, duke e shndërruar FSK-në nga një organizatë e vogël në një forcë të armatosur me kapacitete moderne dhe misione të përbashkëta paqeruajtëse me KFOR-in.
FSK-ja u themelua më 1 janar 2009, pas shpërbërjes së TMK-së, në përputhje me Planin e Ahtisaarit, i cili çoi drejt pavarësimit të Kosovës.
Mundesh me e lexu edhe…
TMK-ja, deri atëherë ishte një organizatë e shërbimit civil të emergjencës dhe pasardhëse e Ushtrisë Çlirimtare të Kosovës (UÇK-së).
Që nga themelimi, FSK-ja ka pasur për detyrë të sigurojë mbrojtjen dhe sigurinë e vendit, duke u angazhuar në operacione të ndryshme humanitare dhe emergjente.
Më 14 dhjetor 2018, Kuvendi i Kosovës miratoi tri ligje që ndryshuan mandatin e FSK-së, duke e transformuar atë në ushtri të Kosovës, por pa ndryshuar emrin.
Këto ligje përfshinin Projektligjin për Ministrinë e Mbrojtjes, Projektligjin për Forcën e Sigurisë së Kosovës dhe Projektligjin për shërbim në Forcën e Sigurisë së Kosovës.
Në kuadër të modernizimit të kapaciteteve, në korrik 2018, FSK-ja u pajis me 51 automjete ushtarake të prodhuara në Shtetet e Bashkuara të Amerikës, të njohura si HMMWV (Humvee).
Nga këto, 24 automjete u blenë nga Qeveria e Kosovës, ndërsa 27 u dhuruan falas nga SHBA-ja.
Përveç modernizimit të pajisjeve, FSK-ja ka intensifikuar bashkëpunimin me KFOR-in dhe forcat ndërkombëtare.
Në mars 2021, dy njësi të FSK-së morën pjesë në misionin e parë paqeruajtës jashtë vendit, duke shënuar një hap të rëndësishëm në angazhimin ndërkombëtar të forcës.
Ndërsa, me një marrëveshje të nënshkruar më 16 dhjetor me kompaninë turke të armëve, MKE, Kosova synon të ndërtojë një fabrikë të municioneve të kalibrave të ndryshëm – të parën në vend.
Gjithashtu, në një sondazh të Institutit Ndërkombëtar Republikan, 86% e të anketuarve e kanë vlerësuar FSK-në si institucion të besueshëm, duke pasqyruar përkushtimin e pjesëtarëve të ushtrisë dhe udhëheqjen transparente të Ministrisë së Mbrojtjes dhe FSK-së në përmbushjen e objektivave. /Katror.info
Përgatiti:
