26 këngë pjesëmarrëse në Festivalin e Këngës në RTSH, plot surpriza tjera

Festivali i Këngës në RTSH këtë vit sjell 26 këngë në konkurrim. Festivali do të zhvillohet mbrëmjet e datave 19, 20, 21 dhe 22 dhjetor.

Një ditë më parë organizatorët e festivalit prezantuan detaje për edicionin e 61 të festivalit këtë vit. Ndryshe nga vitet më parë votat e publikut do të jenë ato, që do të zgjedhin këngën përfaqësuese të vendit tonë në “Eurovision”.

Bojken Lako në grupin organizator të festivalit të këtij viti tha se do të jetë një festival i mirë.

“Personalisht kam marrë pjesë dhjetë herë në festival. Një nga evenimentet kryesore të muzikës në Shqipëri. Kam kënaqësi që në grupin e punës punova me Shpëtim Saraçin. Besoj do bëjmë festival shumë të mirë, që do hapë dhe rrugën për më kualitet edhe në të ardhmen”, tha ai ndër të tjera.

Arbana Osmani e përzgjedhur për të drejtuar këtë edicion të 61 tha se këtë vit, kryefjalë do të jetë kënga.

“Festivali do ketë thelbin te muzika më shumë se çdo vit tjetër. Kemi dashur të sjellim muzikë shumë të mirë cilësore dhe të nxjerrim në pah vokalin. Pjesëmarrja e të rinjve është e madhe”, tha Osmani gjatë konferencës për mediat rreth festivalit.

Krahas mospublikimit të këngëve para performancave në festival, risia më e rëndësishme këtë vit është tek çmimet. Do të ketë juri që do të vendosë tre çmime të para, si dhe një çmim për artistët e rinj dhe një për karrierë.

Vendin tonë në “Eurovision Song Contest 2023” që do të zhvillohet në Britaninë e Madhe, do e përfaqësojë ajo këngë, e cila do të rezultojë më e votuara nga publiku, por pyetjes se nëse publiku mund të zgjedhë një këngë të gabuar, organizatorët u shprehën se të gjitha këngët pjesëmarrëse janë të zgjedhura me kujdes. “

Këngët pjesëmarrëse janë përzgjedhur me kujdes, janë këngë me kualitet, ku komisioni është treguar shumë i kujdesshëm për të zgjedhur këngët më të mira dhe besoj se publiku nuk do të zgjedhë një këngë më të dobët se juria”, tha drejtuesja Arbana Osmani.

Të ftuarit dhe këngët në garë

Festivali do të jetë katër net dhe sa i përket të ftuarve special mendohet të jenë 16. Do të ketë një monolog të veçantë nga aktorja Margarita Xhepa, performancë danci nga Ambeta Toromani e Kledi Kadiu, një tjetër artiste e re shqiptare Gala Aliaj, etj.

Radha e performancave për dy netët e para u vendos në bazë të një shorteu. Komisioni përzgjedhës i këngëve, pasi dëgjoi dhe vlerësoi të gjitha këngët konkurruese për pjesëmarrje në Festivalin e 61 të Këngës në RTSH disa kohë më parë shpalli dhe listën e pjesëmarrësve.

Këngëtarja Elsa Lisa rikthehet në këtë festival me këngën “Evita”, por nuk mungojnë  dhe emra si Rovena Dilo apo Manjola Nallbani.

Në festival këtë vit janë: 2 Farm me këngën “Atomike”; Alban Kondi & Lorela Karoshi -“Melodi”; Albina Kelmendi – “Duje”; Anduel Kovaçi – “Malli”; Arsi Bako -“Sonte dua të jem me ty”; Melodajna Mancaku – “Gjysma e zemrës sime”; Elsa Lila – “Evita”;  Enxhi Nasufi- “Burrë”; Erma Mici- “Kozmosi i dashurisë”; Evi Reçi -“Ma kthe”; Fabian Basha- “Një gotë”; Fifi- “Stop”; Franc Koruni- “Në pritje”; “Genti Hoxha – Ajër” për të vijuar me Gjergj Kaçinarin me “Dje”. Në vijim lista është Luna Causholli me këngën “Jetën ta fal”;  LYNX -“Nëse ke besim”; Manjola Nallbani – “Dua”; Permit of Stay- “Fobia”; Petrit Çarkaxhiu- “Emri yt mirësi”; Rezearta Smaja – “N’Eden”; Rovena Dilo  “Motit”; Sara Kapo- “Para teje”; Serxhio Hajdini – “Vështirë”; Urban Band – “Në çdo hap” dhe Vanesa Sono – “Aroma jonë”./Katror.info