Prishtina mirëpret sot turneun ndërkombëtar të pingpongut “Prishtina Open”, ku 275 sportistë nga 25 shtete do të garojnë në një nga ngjarjet më të mëdha të këtij lloji në rajon, raporton Katror.info.
Në një konferencë për media të mbajtur të enjten, udhëheqësi i klubit të pingpongut PRiPing, Kastriot Orana, konfirmoi se janë bërë të gjitha përgatitjet për edicionin e tretë të turneut.
“Ky është edicioni i tretë i turneut ndërkombëtar të pingpongut që organizohet nga klubi Priping. Megjithëse është një traditë e re, ka pasur interesim të madh nga lojtarë që nuk kanë marrë pjesë në vitet e kaluara. Kemi shumë emra të rinj këtë vit”, tha Orana.
Mundesh me e lexu edhe…
Ai theksoi se përveç lojtarëve nga rajoni, që janë të pranishëm në numër më të madh për shkak të afërsisë, turneu ka tërhequr pjesëmarrës nga vende të largëta si Kolumbia, Brazili, Irani dhe Egjipti, si dhe nga vende të ndryshme të Evropës, përfshirë Bullgarinë, Gjermaninë, Turqinë dhe Francën.
Turneu do të nisë nesër në ora 10:00 me garat në kategorinë U19, ndërsa në mbrëmje do të zhvillohen pesë kategori të veteranëve. Ngjarja sportive do të zgjasë deri të dielën.
Drejtori i sportit në Komunën e Prishtinës, Kushtrim Mushica, tha se komuna është e përkushtuar të mbështesë organizime të tilla ndërkombëtare.
“E kemi në strategjinë tonë për të përkrahur ngjarje si kjo, në mënyrë që të rrisim kapacitetet njerëzore për organizimin e Lojërave Mesdhetare që do të mbahen në vitin 2030. Jemi të lumtur që para pak javësh e patëm edhe turneun WTT, i cili gjithashtu ishte një organizim shumë i suksesshëm,” tha Mushica.
Përkrahje për turneun ka ardhur edhe nga Federata e Pingpongut të Kosovës. Përfaqësuesja e saj, Blerina Boshnjaku, theksoi rëndësinë që kanë gara të tilla për promovimin ndërkombëtar të sportit.
“Këto gara e vendosin jo vetëm Prishtinën, por edhe Kosovën si lokacion dhe pikë në garat ndërkombëtare të pingpongut. Ne si federatë pa dyshim se përkrahim iniciativa të tilla të ndërmarra nga klubet – është pjesë e strategjisë sonë për ndërkombëtarizimin e sportit të pingpongut,” deklaroi Boshnjaku.
Ndërkaq, Katror Media është partner medial i “Prishtina Open” tashmë për tre vite radhazi, duke mbështetur vazhdimisht promovimin e këtij eventi sportiv./Katror.info
