Në një ceremoni solemne të organizuar nga Instituti i Kosovës për Administratë Publike (IKAP), janë ndarë certifikatat për 315 shërbyes civil, të cilët përfunduan me sukses programin trajnues “Zvogëlimi dhe Parandalimi i Barrës Administrative”.
Në këtë ngjarje morën pjesë Zëvendësministri në detyrë i Punëve të Brendshme, Blerim Gashani, përfaqësues nga Ambasada Gjermane dhe Bashkimi Evropian, si dhe drejtues të IKAP-it dhe zyrtarë të institucioneve vendore, shkruan Katror.info.
Zëvendësministri Gashani theksoi rëndësinë e këtij programi si një dëshmi konkrete e bashkëpunimit të qëndrueshëm ndërmjet institucioneve vendore dhe partnerëve ndërkombëtarë.
Mundesh me e lexu edhe…
“Dua të shpreh falënderimin dhe mirënjohjen time të veçantë për përfaqësuesit ndërkombëtarë që na mbështesin në këtë proces të rëndësishëm reformues: Bashkimin Evropian në Kosovë dhe Qeverinë Gjermane për përkrahjen e dhënë në këtë proces përmes projektit të implementuar nga GIZ,” tha Gashani, sipas njoftimit të ministrisë.
Programi, që u zhvillua në bashkëpunim me Zyrën për Planifikim Strategjik të Zyrës së Kryeministrit dhe projektin e GIZ-it “Mbështetje për proceset e reformës së integrimit në BE të Kosovës”, ka për synim rritjen e efikasitetit dhe transparencës në administratën publike, përmes zvogëlimit të barrës administrative që u imponohet qytetarëve dhe bizneseve.
“Trajnimet për zvogëlimin e barrës administrative nuk janë vetëm një çështje teknike, por pjesë thelbësore e përmirësimit të cilësisë së shërbimeve,” shtoi Gashani. “Sa më efikase, më të thjeshta dhe më transparente të jenë procedurat tona, aq më shumë do të rritet besimi i qytetarëve dhe bizneseve në institucionet tona.”
Në përmbyllje, ai siguroi se Ministria e Punëve të Brendshme do të vazhdojë të mbështesë çdo iniciativë që fuqizon kapacitetet institucionale dhe përmirëson marrëdhënien e administratës me qytetarët.
Certifikatat e ndara për 315 pjesëmarrësit shënojnë jo vetëm përfundimin e një programi, por edhe një hap të qëndrueshëm drejt reformimit dhe modernizimit të administratës publike në Kosovë./Katror.info
