Me rastin e jubileut të Trepçës, në Reporting House sot duke filluar nga ora 19:00 do të hapet ekspozita e 500 kristaleve të dhuruara nga vetë Trepça, një gjest simbolik dhe i fuqishëm që pasqyron trashëgiminë industriale, rezistencën dhe identitetin e njërit prej emrave më të rëndësishëm të historisë ekonomike dhe shoqërore të Kosovës.
Këto kristale janë vendur në ambientet e Reporting House në Prishtinë, si një homazh i ndritshëm për trashëgiminë e njërës prej qendrave më ikonike industriale dhe historike të Kosovës.
Kjo ekspozitë po bëhet në 100 vjetorin e Trepçës dhe 1 vjetorin e hapjes së Reportin House. Ky akt instalimi nuk është vetëm një festim vizual është një thirrje për kujtesë dhe vazhdimësi ndaj rëndësisë që ka Trepça, thotë artisti, Gazmend Ejupi.
Mundesh me e lexu edhe…
“Të gjithë gurët ose kristalet vendosen në mbajtëse të telave siç po e shihni. Po duam të krijojmë një mënyrë teatrale instalimin e gurëve ku me krijua më shumë vëmendje për situatën e Trepçës që e ka. Siç e dimë, Trepça ka qenë gjithmonë fillimi i njëfarë revolucioni para luftës. Mirëpo, ai revolucion ende po ekziston si komunitet në Trepçë”, thotë ai për RTK.
Ejupi shton se pasuria më e madhe është historia e Trepçës.
“Pasuritë e mëdha që i kam si referencë është gjithmonë Trepça, stafi i Trepçës që duhet të ketë shumë vëmendje për momentin, gjithmonë që duhet të shihet se çka ka në Trepçë. Trepça e ka muzeun e vet që inkurajoj të gjithë të shkojnë të gjithë me pa. Është një punë shumë e madhe që bëhet aty”.
Kristalet të papërpunuara, mbresëlënëse dhe të ndritshme janë më shumë se mrekulli gjeologjike. Ato janë bartëse të kohës, dëshmitare të përpjekjeve dhe simbole të qartësisë./Katror.info
