Përfaqësuesit e partive të komuniteteve pakicë në Kosovë kanë zhvilluar takime me kryeministrin në detyrë, Albin Kurti, në kuadër të negociatave për formimin e qeverisë së re. Pas takimit, kryetari i Partisë Liberale Egjiptiane (PLE), Veton Berisha, dhe kryetarja e Unionit Social Demokrat (USD), Duda Balje, theksuan se janë në fazën e bisedimeve dhe se vendimmarrja përfundimtare do të varet nga diskutimet e ardhshme, shkruan Katror.info.
Berisha, pas takimit me Kurtin, deklaroi se PLE-ja nuk ka vija të kuqe me asnjë subjekt politik dhe se prioritet mbeten kërkesat për zhvillimin e komunitetit egjiptian. “Kryeministri Kurti ka nisur takime me përfaqësuesit e komuniteteve, dhe edhe ne ishim të ftuar. Diskutuam për një bashkëpunim të mundshëm dhe shpalosëm kërkesat tona. Në parim, nuk kemi asnjë vijë të kuqe me askënd. Nëse bëhemi pjesë e qeverisë, kërkojmë të kemi ndikim në politikat qeveritare për komunitetin egjiptian,” tha ai.
Berisha konfirmoi se PLE-ja do të marrë pjesë në seancën konstituive të Kuvendit më 15 prill, ndërsa për përfshirjen në qeveri do të vendoset në ditët në vijim.
Mundesh me e lexu edhe…
Ndërkohë, edhe kryetarja e USD-së, Duda Balje, konfirmoi se kishte shtruar para Kurtit disa kërkesa për komunitetin boshnjak, por nuk u arrit asnjë marrëveshje konkrete. “Ishte një takim i parë dhe jemi në fazën e bisedimeve. Nuk kemi caktuar takim të ardhshëm, por mbetet të shohim se si do të rrjedhin diskutimet në 15 ditët e ardhshme,” tha Balje./Katror.info
Përgatiti:
